O BNG DEFENDE A CULTURA E O DEPORTE COMO BASE DO BENESTAR DUNHA SOCIEDADE E A SÚA IMPORTANCIA SOCIAL

O BNG DEFENDE A CULTURA E O DEPORTE COMO BASE DO BENESTAR DUNHA SOCIEDADE E A SÚA IMPORTANCIA SOCIAL

O BNG xuntouse a tarde de onte co tecido asociativo, deportivo e cultural, no centro Maruja Mallo de Lugo para analizar as principais problemáticas que está a sufrir o deporte de base galego tralos recortes da Xunta de Galiza

Nesta xuntanza participou responsábel comarcal do BNG de Lugo, Mario Outeiro, e os concelleiros lucenses Antón Bao e Paz Abraira, xunto ao responsábel local do BNG en Lugo, Álex Penas, quen expuxeron a liña política do BNG, “que pasa por unha férrea defensa do asociacionismo cultural e o deporte de base” – afirmou Outeiro

Lugo, 20 de marzo de 2013. O BNG xuntouse a tarde de onte cos representantes do tecido asociativo e cultural da cidade no centro Maruja Mallo nun encontro que tivo como finalidade trasladarlle as principais propostas da política cultural e deportiva do BNG aos clubs e asociacións lucenses e recoller, ao mesmo tempo, as súas demandas e carencias.

Nesta xuntanza participou o responsábel comarcal do BNG de Lugo, Mario Outeiro e os concelleiros lucenses Antón Bao e Paz Abraira, xunto ao responsábel local do BNG en Lugo, Álex Penas, quen expuxeron a liña política do BNG, “que pasa por unha férrea defensa do asociacionismo cultural e o deporte de base”– afirmou Outeiro. Tal e como sinalou Mario Outeiro, “desde o BNG temos claro que a cultura e o deporte son dous piares do benestar dunha sociedade, ademais de ser dous sectores importantísimos para o noso país desde o punto de vista social e económico. Por iso realizamos estes encontros, para poñer en común as nosas ideas e tamén para coñecer as principais problemáticas que afectan ao asociacionismo cultural e deportivo. Por iso ollamos tamén con moita preocupación, unha preocupación que comparten os clubs e asociacións de base, a retirada de liñas de axudas destinadas á promoción deportiva e cultural para os colectivos por parte da Xunta de Galiza. En concreto, a Xunta retirou as axudas destinadas ao asociacionismo cultural que xa tiña convocadas para 2011 e parte de 2012, nunha “chafallada” de decreto, e que aínda por riba de eliminalas só estarían dotadas con 300.000 euros para toda Galiza, unha cantidade irrisoria”.

Segundo explicou Mario Outeiro, “o BNG ten fixado no seu ideario unhas prioridades claras, apostando por lo deporte que teña en conta tanto a súa vertente, educativa, de promoción do deporte base e da actividade física saudábel, como o ámbito competitivo, impulsando a actividade profesional deportiva de alto nivel en Galiza. Así as cousas, o BNG desde as institucións onde ten responsabilidades de goberno, como concellos ou a Deputación de Lugo, aposta claramente polo afortalamento do deporte de base en todas as súas modalidades e disciplinas, apostando tamén por prácticas deportivas “minoritarias” (termo que daría para moito debate porque hai disciplinas minoritarias en repercusión mediática pero que en número de practicantes suman milleiros de licenzas), e por unha concepción do deporte como unha parte fundamental do benestar das persoas”.

Por outra parte, afirmou Outeiro, “para o BNG a cultura é unha ferramenta esencial para a cohesión e a transformación social e o fortalecemento da consciencia e a identidade nacional. O BNG acredita nunha cultura galega viva, con intención formadora no persoal e transformadora no social, que estimule a participación cidadá, apoie a creación artística, visibilice a nosa produción cultural e actúe como elemento de dinamización e vertebración territorial, social e económica do noso país. Por iso cremos firmemente no asociacionismo de base, o xerme e motor da cultura no noso País, algo que sen dúbida se ve referendado polas políticas que o BNG executa alá onde goberna. É tamén por isto onde o noso ideario choca frontalmente coa política cultural do PP: dende a chegada do Partido Popular á Xunta de Galiza no 2009, o orzamento dedicado a cultura foi minguando ano tras ano; paralizáronse as redes de programación cultural, rachouse o diálogo cos representantes do sector, atacouse o idioma propio cun decreto que o marxina e incluso a Axencia Galega das Industrias Culturais (AGADIC) estivo sen xerente preto de medio ano. Todas estas circunstancias describen unha situación dramática para a cultura galega, algo que recoñece o propio Consello da Cultura Galega nun dos seus informes, e que se agrava progresivamente pola falta de vontade do Executivo que preside Alberto Núñez Feijóo para buscar solucións. Non se explica doutro xeito o recente nomeamento de Jacobo Sutil Nesta como director do AGADIC, unha persoa que, como el mesmo destacou na súa toma de posesión, non está vinculada ao mundo da cultura e das artes”.

O BNG DEFENDE A CULTURA E O DEPORTE COMO BASE DO BENESTAR DUNHA SOCIEDADE E A SÚA IMPORTANCIA SOCIAL