“COMPARECENCIA COSMÉTICA” ASÍ CUALIFICOU PAZ ABRAIRA A SOLICITUDE DE LUIS ÁLVAREZ NO VINDEIRO PLENO

“COMPARECENCIA COSMÉTICA” ASÍ CUALIFICOU PAZ ABRAIRA A SOLICITUDE DE LUIS ÁLVAREZ NO VINDEIRO PLENO

IMG_5572

A voceira do BNG afirmou que “o goberno municipal aínda non sabe que é o que lle vai reclamar á empresa despois da folga”

Abraira insistiu en que “o goberno municipal tiña que dar as explicacións naquel momento e convocar a xunta de portavoces cando lle foi requirido dende o BNG”

Lugo, a 26 de agosto de 2014. A voceira do BNG, Paz Abraira, deu conta do acontecido na comisión de urbanismo e medio ambiente. Abraira cargou contra o tenente de alcalde e concelleiro de Medio Ambiente do concello de Lugo despois de debatir, na comisión celebrada onte, sobre a comparecencia no pleno para dar explicacións sobre a folga de recollida do lixo. Abraira dixo que a intervención de Luis Álvarez será "unha comparecencia cosmética". A edil nacionalista criticou tamén a actitude do PP que "durante a folga somentes estivo ao servizo da empresa Urbaser".

Paz Abraira informou que “nesa comisión o BNG abstívose na petición de comparecencia voluntaria do concelleiro de Medio Ambiente por que é unha farsa”. Abraira insistiu en que “o goberno municipal tiña que dar as explicacións naquel momento e convocar a xunta de portavoces cando lle foi requirido dende o BNG”. Abraira cualificou de “comparecencia cosmética” a solicitada polo concelleiro de Medio Ambiente por tratarse de “un paripé máis deste goberno socialista que conta mentiras sobre mentiras por que quen tomou as decisión foi a empresa e non o goberno municipal que está totalmente desfeito”.  Abraira referiuse tamén ás ameazas de intervención do servizo, feitas polo goberno municipal, “cando a realidade, pola documentación elaborada, é que nunca houbo intención de intervir os servizo”.

Nesta comisión, previa ao pleno do día 1 de setembro, o concelleiro de Medio Ambiente, Luis Álvarez, deu resposta ás preguntas presentadas polo BNG relacionadas coa pasada folga de limpeza e recollida do lixo. Abraira explicou que “o goberno non deu resposta nin convocou a xunta de portavoces pero onte ao concelleiro responsábel de Medio Ambiente, Luis Álvarez, non lle quedou outro remedio que dar resposta ás preguntas presentadas polo BNG para a súa resposta en comisión” esto sucedeu despois de que o BNG solicitara a convocatoria da xunta de portavoces co fin de tratar de esclarecer o que estaba sucedendo durante esa folga que durou case 2 meses. Os nacionalistas presentaran, tamén, diversas preguntas para a súa resposta escrita.

Paz Abrira dixo que “a comisión de Medio Ambiente puxo de manifesto a falta de vontade do goberno socialista de dar conta do que aconteceu realmente durante a folga do lixo”. Abraira sinalou que “resulta curioso que este concelleiro solicite comparecer voluntariamente no pleno” e engadiu que “pretende lucirse cando este goberno non estivo á altura para resolver os problemas dos veciños e veciñas de Lugo”. Para o BNG esta petición de comparecencia é “unha falta de respeto para os cidadáns” xa que “a actuación do goberno municipal careceu de luces, foi errática e carente de forza ante a empresa Urbaser”.

Culpabilizar a traballadores e traballadoras

Abraira cualificou de “actitude rastreira” a de Luis Álvarez que, segundo a nacionalista, “agora pretende quedar como salvador da situación que se deu no concello de Lugo”. O BNG preguntou, nesta comisión, por que non se mantiveron contactos cos traballadores para informalos dos acordos da Xunta de Goberno, a esto, o responsábel de Medio Ambiente dixo que “o concello non ten relación directa cos traballadores da empresa”. Abraira criticou que “non se falara cos traballadores” pero “o goberno si que foi raudo respondendo a queixas de algúns veciños, a través da comisión de queixas e reclamacións, e culpabilizando aos traballadores e traballadoras da situación que se deu durante a folga”.

Proteción policial a Urbaser

A voceira do BNG sinalou que o concelleiro de Medio Ambiente “admitiu que a presenza policial fora demanda pola empresa Urbaser e o concello atendeu única e exclusivametne á empresa, someténdose á chantaxe que Urbaser lles impuxo a todos os lucenses”. “Se o custe dos servizos policiais se lle van repercutir á empresa” preguntou o BNG. Un elevado custo que ronda os 25.000 € informou Abraira. Segundo Paz Abraira “o expedente segue aberto pero non hai conclusións por eso non se sabe o que se lle vai reperctuir á empresa”. A forte presenza policial blindando o concello foi motivada, segundo o edil de Medio Ambiente, polo medo aos traballadores. Para o BNG a actitude dos traballadores e traballadoras foi pacífica a pesares da duración desta folga.

“COMPARECENCIA COSMÉTICA” ASÍ CUALIFICOU PAZ ABRAIRA A SOLICITUDE DE LUIS ÁLVAREZ NO VINDEIRO PLENO