Arroxo afirmou que “a falta de dialogo para a aprobación das ordenanzas fiscais é un exemplo máis”

Os nacionalistas presentaron unha queixa formal, ante o goberno municipal, polo intento de vetar a presenza dos grupos da oposición en actos do concello

Lugo, 12 de novembro de 2015. O voceiro do BNG – Asembleas Abertas no concello de Lugo criticou unha vez máis a actitude do goberno municipal “que se empeña en desprezar aos grupos da oposición”. Rubén Arroxo sinalou que “a Xunta de Goberno aprobou unha proposta de ordenanzas fiscais sen manter ningún contacto cos grupos da oposición, ou polo menos co BNG – Asembleas Abertas” e engadiu que “o goberno debería darse conta da diversidade e cantidade de grupos que existe nesta corporación, mais parece que aínda non se deron conta”.

Rubén Arroxo explicou que “unha vez máis o goberno municipal vai con retraso para presentar aos grupos da oposición un documento chave para a gobernabilidade do municipio, e aínda así, despois de telo aprobado en Xunta de Goberno se permiten non envialo aos grupos da oposción”. Arroxo lembrou que a aprobación dos orzmentos depende, en certa medida, da aprobación das ordenanzas fiscais e “estamos a mediados de novembro”.

Arroxo dixo que “agardamos que o goberno contemplara nas ordenanzas as diferentes propostas que se lle foron enviando dende os diferentes grupos municipais para poder chegar aos acordos necesarios que leven á aprobación deste documento, un primeiro paso necesario para que Lugo conte cuns orzamentos aprobados en tempo e forma para o ano vindeiro”.

Veto á presenza da oposición

Os nacionalistas presentaron unha queixa formal, ante o goberno municipal, polo intento de vetar a presenza dos grupos da oposición en actos do concello. Arroxo dixo que se trata “dunha falta de consideración cara os grupos municipais que representamos dado que reiteradamente se ven excluindo a nosa presenza de actos significativos para este concello no que a totalidade e diversidade da corporación debería estar representada”. Arroxo citou, como exemplo, unha listaxe de actos aos que non foron convidados representantes dos grupos da oposición:

7/9/2015 – Recepción a moz@s participantes no programa de emprego Lucus Mundi.

8/9/2015 – Presentación da imaxe de Lugo no cupón da ONCE

19/9/2015 – Recepeción xogadoras do equipo do Milgrosa SDC

29/9/2015 – Acto da Real Academia Galega celebrado no concello de Lugo

8/10/2015 – Entrega de premios do concurso de tapas

27/10/2015 – Recepción escolares dun centro lucense.

3/11/2015 – Entrega premios de debuxo concurso celebrado durante o S. Froilán

4/11/2015 – Inauguración da exposición de 47 artistas no MIHL

12/11/2015 - Recepción escolares dun centro lucense.

12/11/2015 – Presentación concurso de Tapas.