A responsábel comarcal, Esther López, apostou “por unha celebración unitaria do 25 de xullo, na que participemos todas as persoas que lle queremos a este país”

Haberá actuacións musicais e intervirá o portavoz nacional do BNG, Xavier Vence

Lugo, 16 de xullo 2015. A responsable comarcal do BNG de Lugo, Esther López, anunciou hoxe que o BNG abrirá, en Lugo, as celebracións do Día da Patria cun acto na praza do Campo Castelo este sábado ás 13:00. Neste acto contará coa intervención do voceiro nacional do BNG, Xavier Vence e da responsábel comarcal do BNG en Lugo, Esther López. Ademais está prevista a actuación do grupo de música tradicional Pingarela.

Esther López significou que “o BNG comparte a proposta xa expresada por diferentes voces do ámbito político, cultural e social do país instando a facer unha celebración unitaria do Día da Patria a todo o nacionalismo galego, organizado e non organizado, formacións políticas, colectivos, persoas a título individual e cidadanía no seu conxunto que compartan o sentimento de Galiza como nación”.

López, apostou “por unha celebración unitaria do 25 de xullo, na que estemos toda a xente que lle quere a este país”  e sinalou que “en todo caso, o Bloque fíxase como demanda política para o Día da Patria a defensa dos dereitos nacionais de Galiza na perspectiva dun novo contexto que, previsiblemente, se abrirá no conxunto do Estado”. López informou que o BNG está a celebrar a súa propia campaña por todo o país con actos festivos arredor da idea da “unidade” de Galiza e celebrará tamén o habitual certame do Festigal, dúas xornadas de conferencias, debates, intercambio de ideas e música na Alameda compostelá.