“Xa foron varias as persoas que caeron no entorno da fonte por culpa dun pavimento esvaradizo” sinalou Paz Abraira

Ademais do arranxo das fontes como un elemento patrimonial os nacionalistas apelan á utilidade das mesmas para que poidan ser utilizadas por veciños e veciñas

Lugo, 8 de outubro 2014. O BNG presentou un rogo no concello de Lugo para que se proceda a darlle unha solución á fonte da parroquia de Lamas. Esta fonte foi recentemente rehabilitada polo concello de Lugo. Segundo informou Paz Abraira “a fonte está rodeada dun pavimento esvaradizo e foron varias as persoas que sufriron caidas no entorno da fonte ao tratar de acceder a ela”. Paz Abraira visitou a fonte acompañada dun grupo de veciños e veciñas para comprobar cal é o seu estado actual.

Os nacionalistas pediron, a través do seu rogo, que técnicos do concello avalien as diferentes posibilidades para darlle solución a este problema e se proceda a facer os arranxos necesarios para evitar que o acceso á fonte se convirta nun perigo constante para as persoas que a ele acuden. Ademais do arranxo das fontes como un elemento patrimonial, para o BNG “é fundamental que se manteña a utilidade das mesmas para que poidan ser utilizadas por veciños e veciñas”.