O BNG ORGANIZOU, EN LUGO, ESTA XORNADA FESTIVA DENTRO DOS ACTOS PROGRAMADOS POLA FORMACIÓN NESTE MES NO QUE SE CELEBRA O DÍA DA PATRIA

Máis de 150 militantes e simpatizantes do BNG compartiron un xantar como antesala á celebración do 25 de xullo

No acto interviron o voceiro do BNG en Lugo, Rubén Arroxo,  e as parlamentarias Olalla Rodil e Noa Presas

Máis de 150 militantes e simpatizantes do BNG compartiron un xantar como antesala á celebración do 25 de xullo

Lugo, 15 de xullo 2018. O BNG organizou, en Lugo, un encontro de militantes e simpatizantes como antesala á celebración do Día da Patria. Esta xornada festiva enmarcase dentro dos actos programados pola formación neste mes no que se celebra o 25 de xullo. Ademais de xogos infantís e música tradicional houbo un xantar no que participaron máis de 150 persoas e no que houbo intervencións do voceiro do BNG en Lugo, Rubén Arroxo,  e as parlamentarias Olalla Rodil e Noa Presas.

O voceiro do BNG e candidato á Alcaldía por Lugo, Rubén Arroxo, fixo un chamamento a participar masivamente na celebración do Día da Patria, que o BNG conmemora este ano baixo o lema Sumar por Galiza, precisamente como referencia expresa a unir a todas as persoas que confían no potencial do país para construír un futuro mellor.

construír a Galiza coa que soñamos

“Desde Lugo facemos un chamamento a participar nunha convocatoria aberta para sumar polo país, aberta a todos os galegos e as galegas que levan Galiza na cabeza e no corazón e que, igual que o  BNG, queren construír un futuro mellor, onde a nosa lingua e cultura podan desenvolverse con normalidade, con emprego digno,  salarios e pensións decentes. En definitiva, construír a Galiza coa que soñamos”, salientou Arroxo durante a súa intervención.

Pola súa banda, Olalla Rodil puxo en valor a tradición galeguista e nacionalista de Lugo. “Foi onde se celebrou a primeira asemblea nacionalista, que reuniu en Lugo aos fundadores do que foi o xermolo do que hoxe é o BNG, e por iso convido a unha celebración masiva do Día da Patria”.

As Parlamentarias do BNG, Rodil e Presas, coincidiron en recalcar a necesidade de que Galiza conte con forzas políticas propias para defender os intereses dos e das galegas, ante uns partidos estatais que se alternan na discriminación a este país mudando o discurso segundo estean no goberno ou na oposición. “Se algunha nación sen estado precisa un proxecto político propio esa é Galiza, porque padecemos máis as consecuencias do centralismo e padecemos máis ter forzas políticas que non miran pola xente deste país senón polos intereses que marcan as súas direccións a nivel estatal”, alegaron, “e nestas semanas vemos como cambia o guión das forzas estatais en función de se están no goberno ou na oposición, sen preocuparse por unha Galiza que perde oportunidades pero que ten dereito a ganar”.