O Secretario Xeral de Educación respondeu con evasivas ás preguntas do BNG e dixo que a consellería retrasa as inversións no colexo lucense por non ser prioritarias

O parlamentario Cosme Pombo presentou unha batería de preguntas na comisión de Educación do Parlamento Galego sobre o futuro do CEIP Anexa de Lugo

A Xunta comprometeuse, fai dous anos, a construír un novo colexio nos terreos do Polideportivo da Facultade de Formación do Profesorado para resolver o problema

LUGO, 22 de outubro de 2013. O Secretario Xeral de Educación contestou con evasivas ás preguntas do parlamentario do BNG Cosme Pombo e non foi quen de concretar datas para acometer as necesarias ampliacións e melloras no CEIP Anexa de Lugo. O BNG presentou na comisión de educación do Parlamento Galego, por boca do parlamentario Cosme Pombo, unha serie de preguntas sobre o CEIP Anexa. Hai agora dous anos que a Xunta, por medio da súa xefatura territorial da consellería de Educación de Lugo, prometeu construír un novo colexio para o CEIP nos terreos do Polideportivo da Facultade de Formación do Profesorado para resolver o problema. Coa construción deste novo centro garantiríase a continuidade do CEIP Anexa no edificio actual e máis nese novo centro. Cosme Pombo manifestoulle ao Secretario Xeral de Educación a necesidade de construír unha pasarela de acceso para o alumnado de infantil e evitar que se mollen nos días de chuvia.

O BNG quere que o representante do goberno da Xunta na Comisión de Educación do Parlamento de conta de cal é a razón do incumprimento, por parte da Xunta, da promesa de construír un edificio para o CEIP Anexa de Lugo nas proximidades da edificación actual e tamén se é  consciente a Xunta de Galiza do dano que produce aos intereses do CEIP Anexa de Lugo coa decisión que acaba de tomar, faltando á palabra dada. En canto á pregunta do parlamentario do BNG sobre se a Xunta de Galiza ten previsto a posibilidade de reconsiderar o acordo tomado e deixalo en suspenso ata que non se cumpra a promesa feita á comunidade educativa do CEIP Anexa de Lugo o representante da xunta respostou que “a consellería non ten intención de que a Anexa abandone a súa actual ubicación”. Respecto ao prazo que ten previsto a Xunta para acometer as obras prometidas ao CEIP Anexa a resposta foi que a Xunta non renuncia á inversión prometida no CEIP Anexa si ben RETRASA o seu investimento porque priorizan outras inversións.

No mes de xullo deste mesmo ano produciuse un acordo entre Xunta e USC para que a Escola de Formación do Profesorado de Lugo comparta tres aulas do CEIP Anexa. Este acordo provocou as protestas da ANPA deste centro e mesmo do propio centro porque se incumpre a promesa feita pola consellería de Educación de construción dunha edificación para ubicar parte das aulas do CEIP Anexa. Para o BNG “resulta indignante que a decisión se adopte en xullo durante as vacacións escolares” e “non é de recibo a improvisación dun goberno que non permite compartir ESO e FP no colexio das Mercedes de Lugo pero que autoriza a invasión dos espazos dos máis pequenos do CEIP Anexa polos universitarios da Escola de Formación do Profesorado”.

Cosme Pombo lembrou que “o Grupo Parlamentar do BNG, sabendo da necesidade de construción dunha edificación para garantiren a continuidade do centro público CEIP Anexa de Lugo, presentou unha emenda aos orzamentos da Xunta de Galiza para o ano 2013 que foi votada en contra polos deputados/as do Partido Popular”.

No CEIP Anexa están matriculados 450 alumn@s e dende hai varias décadas teñen problemas de espazo para poder impartir o ensino público, de infantil e primaria, cos parámetros de calidade que os tempos actuais demandan. Dende hai varias décadas tamén, a escola de maxisterio leva reclamando máis espazo polo incremento de alumnado e as necesidades de formación de graos e masters. O BNG entende como prioritario o defender a continuidade do CEIP Anexa de Lugo, cos espazos necesarios para garantiren unha educación de calidade e a altura dos tempos nos que estamos a vivir. Cosme Pombo aclarou que “non se trata, nin é intención do BNG, de dar prioridade a un centro sobre outro se non que se trata de poñer a educación pública en primeiro lugar”.

O Colexio Público Anexa de Lugo está ubicado, dende a mediada do século pasado (curso 1955/56) nun edificio anexo a Maxisterio para que os/as alumnos/as desa facultade puidesen facer prácticas. Andando o tempo (curso 96/97), o centro escolar foi gañando autonomía e converteuse nun CEIP público referente no centro da Cidade de Lugo.