Imprimir

O BNG reclama un Xulgado Específico de Violencia de Xénero que atenda os casos que xurden na comarca

bnglugocentro | 16 de xaneiro de 2019

A Parlamentaria do BNG visitou Vilalba e mantivo unha xuntanza na que manifestou “estamos traballando para que todas as comarcas conten con acceso a un xulgado específico con persoal formado”

Vilalba, 16 de xaneiro de 2019. A parlamentaria do BNG, Olalla Rodil, visitou o concello de Vilalba nunha ronda de visitas que está a facer por diversos concellos das comarcas de Lugo. Olalla Rodil sinalou que “continuaremos traballando por que a violencia contra as mulleres non para e contar cun Xulgado Específico significa ter persoal formado e especializado para abordar os casos que chegan á vía xudicial”. Con esta demanda o BNG de Vilalba únese á demanda doutros concellos da Comarca para que se instale en Lugo un Xulgado Específico de Violencia de Xénero.

Un Xulgado Específico de Violencia de Xénero terá que dar atención a mulleres de toda a provincia, para que estes casos teñan un tratamento axeitado. A proposta que defendemos suporía que o Xulgado acollese todos os casos que se produzan en todas as comarcas da provincia de Lugo, sendo atendidos por profesionais especializados e con formación na materia.

Neste momento unicamente as cidades de Vigo e Coruña dispoñen de xulgado específico de violencia de xénero. A posta en marcha deste xulgado en Lugo podería dar cobertura a toda a provincia e compre unha dotación mínima de persoal que inclúe as figuras de xuíz, fiscal, forense, secretario e funcionariado adscrito. Este xulgado podería atender os casos de violencia: maltrato, acoso e custodia de menores, ademais do seguimento de ordes de alexamento antes e despois do xuízo.

Olalla Rodil precisou que “esta decisión depende do Consello Xeral do Poder Xudicial”. A parlamentaria nacionalista lembrou as disparatadas cifras dos casos de violencia de xénero e sinalou que en Lugo hai 468 activos no programa VIOGEN do Ministerio do Interior. En 2017, segundo os datos publicados recentemente polo Consello Xeral do Poder Xudicial (CXPX) na provincia de Lugo cometéronse 696 delitos de violencia machista, case dous ao día, incrementándose a respecto 671 cometidos no ano 2016. No conxunto do estado contabilizouse a cifra total de 163.132 delitos de violencia machista. Desde o BNG queremos este recurso para atender de maneira acaída as mulleres da provincia pero tamén queremos que a campaña que hoxe lanzamos sirva para concienciar o conxunto da sociedade.

Podes ver este artigo na próxima dirección /articulo/novas/bng-reclama-xulgado-especifico-violencia-xenero-atenda-casos-xurden-comarca/20190116140231006993.html


© 2019 Comarca de Lugo Centro

Bloque Nacionalista Galego

Avda. Rodríguez de Viguri, 16 baixo
15703 Santiago de Compostela (GALIZA)
Teléfono: +34981555850
Correo: sedenacional@bng.gal