Imprimir

A Concellería de Cultura recupera os xigantes que acompañarán aos cabezudos no San Froilán

bnglugocentro | 03 de outubro de 2019

As figuras dos xigantes foron restauradas despois de varios anos sen uso

Lugo, 02 de outubro de 2019. A Concelleira de Cultura, Turismo e Promoción da Lingua, Maite Ferreiro, visitou no día de hoxe o vello cárcere, onde se levaron a cabo os traballos de restauración, que foran iniciados xa no anterior mandato, das figuras dos xigantes, que durante esta edición da gran festa do outono galego volverán ás rúas xuntos cos cabezudos. As dúas figuras de xigantes recuperadas teñen máis de tres décadas de antigüidade. Segundo indicou Maite Ferreiro, “estas figuras levaban anos sen participar nas festas, e a partir deste ano volverán ser un atractivo máis na animación polas rúas de Lugo”.

 

Os xigantes e cabezudos estarán presentes nesta edición das festas desde o día 4, despois do pregón, animando a praza Maior xunto coa Charanga Terra Chá + Reviravolta. O día 5, xunto cos Xílgaros de Lugo, farán un pasarrúas polo recinto histórico da cidade. O venres 11 estarán pola zona dos viños xunto coa charanga Unión Phenosa e pecharán as festas o día 12, xunto á Foliada de Bosende por Campo Castelo, praza da Constitución e Praza de Bretaña.

Podes ver este artigo na próxima dirección /articulo/novas/concelleria-cultura-recupera-xigantes-acompanaran-aos-cabezudos-san-froilan/20191003120949007495.html


© 2019 Comarca de Lugo Centro

Bloque Nacionalista Galego

Avda. Rodríguez de Viguri, 16 baixo
15703 Santiago de Compostela (GALIZA)
Teléfono: +34981555850
Correo: sedenacional@bng.gal