Imprimir

A Concellería de Infraestruturas Urbanas informa do inicio das actuacións do novo Plan de Tráfico da Milagrosa

bnglugocentro | 17 de xuño de 2020

Rubén Arroxo e Alexandre Penas na Milagrosa
Rubén Arroxo e Alexandre Penas na Milagrosa

“No día de hoxe procedeuse ao traslado dos semáforos, e nos vindeiros días realizarase o pintado das rúas”, informou Alexandre Penas

O edil de Infraestruturas destacou que “a veciñanza da zona desfrutará dunha reordenación do tráfico que axilizará a fluidez de vehículos e mellorará a circulación”

Lugo, 17 de xuño de 2020. O concelleiro de Infraestruturas Urbanas, Alexandre Penas, informou á veciñanza do barrio da Milagrosa do inicio dos traballos de adaptación do novo Plan de Tráfico. “Segundo o plan de traballo, hoxe procederase ao traslado dos semáforos ás novas ubicacións e nos vindeiros días realizarase o pintado da nova sinalización horizontal e a actualización da vertical”, declarou Alexandre Penas.

O edil de Infraestruturas Urbanas pediu á veciñanza “que circulen con precaución e seguindo as indicacións da sinalización de obra para garantir a seguridade da veciñanza e das traballadoras e traballadores”. Desde a concellería de Infraestruturas xunto coa empresa encargada dos traballos, tratarase de realizar a actuación entorpecendo o mínimo posíbel a circulación e reducindo ao máximo o tempo empregado na realización dos traballos para evitar molestias á veciñanza.

Alexandre Penas, declarou que  “as veciñas e veciños do barrio da Milagrosa desfrutarán dunha reordenación do tráfico que axilizará a fluidez de vehículos e mellorará a circulación da zona”. No proxecto que se está a levar a cabo contémplase o cambio de sentido de varias rúas. “Crearase unha supermazá que una a avenida da Coruña e Yañez Rebolo, permitindo o xiro en sentido horario”, informou Alexandre Penas, que engadiu “ademais permitirase o acceso á praza Agro do Rolo desde a Avenida da Coruña, que actualmente só estaba habilitado de maneira provisional para autobuses”.

Podes ver este artigo na próxima dirección /articulo/novas/concelleria-infraestruturas-urbanas-informa-do-inicio-das-actuacions-do-novo-plan-trafico-da-milagrosa/20200617131626008073.html


© 2020 Comarca de Lugo Centro

Bloque Nacionalista Galego - Sede Nacional

Avda. Rodríguez de Viguri, 16 baixo
15703 Santiago de Compostela (GALIZA)
Teléfono: 981555850
Correo: sedenacional@bng.gal

Bloque Nacionalista Galego - Sede comarcal 

Rúa Miguel de Cervantes, 34, 1º Entresollado
27003  Lugo (GALIZA)
Teléfono: 982280410
Correo: lugocentro@bng.gal