esta
O BNG confirma que o circo con animais está sen autorización municipal

O BNG confirma que o circo con animais está sen autorización municipal

“Despois de revisar toda a documentación, podemos confirmar que non existe tal autorización” Afirmou Rubén Arroxo

Lugo, 19 de setembro de 2016. O voceiro do BNG, Rubén Arroxo informou que o polémico circo con animais instalado en Augas Ferreas non conta coa autorización municipal para a súa instalación “despois de revisar toda a documentación, podemos confirmar que non existe tal autorización”. Deste xeito dende a organización nacionalista esíxenlle á alcaldesa Lara Méndez que tome unha decisión clara ao respecto “a alcaldesa non pode permitir que iso siga aí, cando non conta coa autorización municipal necesaria e está a saltar o acordo plenario que declarou Lugo libre de circos con animais, urxe que sexa retirado”.

 

Este feito está a causar un forte malestar entre a veciñanza da zona, preocupada entre outras cuestións polas medidas de seguridade, dado que se colocaron instalacións con animais salvaxes, tales como elefantes ou tigres, sen que existan os permisos necesarios. Tamén volveu abrir a polémica dende os colectivos animalistas, dado o maltrato que supón para estes animais ter que botar toda a súa vida nunha gaiola.

IMG_20160919_185043

Para Rubén Arroxo, que aínda non recibiu ningunha resposta das preguntas presentadas ao goberno municipal sobre isto, considera que isto non se pode consentir “se non se é contundente con quen se instala sen autorización, mañá podería chegar calquera, montar un campo de tiro na rúa da Raíña e quedariamos mirando para eles” afirmaba isto mentres consideraba que unha cuestión tan grave coma esta non se pode tomar coa tranquilidade que se está amosar dende o goberno municipal.

Ler nova