Os nacionalistas utilizarán, en Lugo, unha caravana publicitaria con bicicletas para pedir o voto nos comicios ao Parlamento Europeo do 25 de maio

Olalla Rodil dixo que “os mozos e mozas galegos queremos vivir e traballar neste país non pode ser que nos obriguen a emigrar e que se mofen de nos dicindo que se adquire experiencia”

Lugo, 12 de maio 2014. O BNG realizou, hoxe en Lugo, un acto de presentación da campaña “sobre rodas” que se levará a cabo para pedir o voto nos comicios ao Parlamento Europeo do 25 de maio. Os nacionalistas utilizarán, para boa parte da campaña, a bicicleta como medio de difusión da súa mensaxe. Segundo a número tres da lista do BNG, Olalla Rodil, “queremos chegar á xente para que coñezan as propostas do BNG e cal foi o traballo da eurodeputada Ana Miranda durante estes anos en Bruxelas”. Despois dun pequeno acto na zona peonil da ronda a caravana ciclista do BNG, formada por unhas vinte persoas, deu unha volta á muralla de Lugo.

A partir de hoxe, e durante o tempo que dure a campaña, as bicicletas do BNG terán presenza nas rúas e nos barrios lucenses. Olalla Rodil dixo que “a campaña do BNG vai sobre rodas” e aproveitou para manifestar o agradecemento do BNG a todas persoas, militantes e simpatizantes do BNG, que están a colaborar nesta campaña electoral “aportando tempo, traballo e esforzo”. O BNG está a levar  acabo unha campaña austera, baseada nas aportacións e colaboracións da súa militancia e simpatizantes. O BNG está a facer esta campaña sen subscribir ningún crédito bancario, sin depender de "bancos, nin lobbies" so do "traballo militante".

Olalla Rodil dixo que “a mocidade galega ten que implicarse e participar das organizacións políticas por que o noso futuro vai a decidirse, en boa parte, en Bruxelas” e engadiu que “non se pode consentir que se continúen a facer políticas contra as persoas, os mozos e mozas temos que dicir: ata aquí chegamos”. Grande parte do peso da campaña que o BNG realizará en Lugo, utilizando bicicletas, recaerá na mocidade do BNG e na organización Galiza Nova.

“Ana Miranda existe”

Olalla Rodil dixo “alegrámonos moito de que Ana Miranda xa exista oficialmente” en referencia ao dictame da Xunta Electoral Provincial de A Coruña desestimando o recurso de UPyD no que se pedía a exclusión do BNG da cobertura informativa da campaña electoral co argumento de non ter a consideración de "forza parlamentar" a formación nacionalista. Baseaba o seu recurso UPyD en que, segundo a Xunta Eleitoral Central, o escano obtido en 2009 pola coalición en que estaba integrado o BNG pertencía en realidade a ERC. Ese escano foi rotatorio e Ana Miranda si foi, por espazo de 18 meses, eurodeputada. O BNG obtivo 103 mil votos e conseguiu escano naquel proceso electoral.