O voceiro do BNG afirmou que “parece que a única preocupación do PSOE está nos despachos para asentar ao seu gabinete e asignarse bos salarios”

Arroxo dixo que algúns barrios da cidade precisan dun plan de intervención urxente para manter unha cidade viva e axeitada para as persoas

Lugo, 16 de xullo 2015. O voceiro do BNG-AA no concello de Lugo, Rubén Arroxo, anunciou que “agora que están as comisións constituídas, comezaremos a reivindicar servizos e melloras para os barrios da cidade”. Rubén Arroxo lembrou que “durante toda a campaña electoral visitamos os barrios e falamos coa xente para coñecer as súas necesidades, agora cumpriremos coa nosa obriga para facer que Lugo sexa unha cidade para as persoas”.

Arroxo dirixiuse directamente á liña de actuación que debe de seguir o goberno e dixo que “os problemas reais da xente non se ven nas catro paredes da casa consistorial, senón nos barrios”  e engadiu que “parece que a principal preocupación do PSOE nestes días estivo en pactar co PP  asentar ao seu gabinete e asignarse bos salarios”. O voceiro do BNG afirmou que “veciños e veciñas están empezando a contactar co BNG para solucionar os seus problemas por que saben que defendemos os seus problemas”.

“Está moi ben que PP e PSOE traten de centrar o foco de atención no Garañón pero as persoas viven nos barrios e alí é onde hai que facer traballo para mellorar as condicións de vida da xente” dixo Rubén Arroxo. “O tema do Garañón vaise decidir nos xulgados e entendemos que PP e PSOE están nerviosos por este asunto xa que, como todo o urbanismo desta cidade, foi cociñado a medias entre os dous” afirmou Arroxo.

Perigo de derrubamento de fachadas no barrio Feixoo

O BNG – AA levará unha iniciativa á comisión correspondente para que o concello de Lugo tome as medidas necesarias para previr posibles derrubamentos de edificacións cun alto grado de deterioro no barrio Feixoo. Ademais os nacionalistas pediran que se garanta a limpeza de predios que aínda permanecen sen pechar nesta zona da cidade e que son foco de sucidade e provocan malestar entre o vecindario. Rubén Arroxo e Maite Ferreiro reuníronse cun grupo de veciños e veciñas que lles trasladaron algunhas das melloras que precisa o barrio.