Lugo, 16 de novembro de 2020. A concelleira de Cultura, Turismo e Promoción da Lingua, Maite Ferreiro, anunciou os gañadores dos concursos de disfraces e escaparates organizados co gallo do Samaín, “dúas citas que permitiron á veciñanza coñecer as salas museísticas de Lugo ao mesmo tempo que promocionamos os comercios da cidade”, explicou Maite Ferreiro.

A área de Cultura repartiu en total 6.000€ en vales que se entregarán ás gañadoras e gañadores do concurso de disfraces para que invistan nos negocios gañadores do concurso de escaparates. “Tentamos desta maneira colaborar na reactivación do comercio local despois da crise sanitaria”, declarou Maite Ferreiro.

Os establecementos participantes no concurso de escaparates tiveron que decorar os seus escaparates coa temática do Samaín. O xurado designado pola Área de Cultura, Turismo e Promoción da Lingua estivo composto por un técnico da área e dúas persoas vinculadas ao sector do teatro, das artes aplicadas e o deseño. O xurado valorou a composición estética, orixinalidade e adecuación á temática.

Os tres primeiros premios foron para a Queixaría Arcadio Costas, El Faro de los Tres Mundos e Craft & Tea. Ademais, entregáronse cinco accésits a Triskel, Lilas Lencería, Mariña, Pauxi Pauxi Complementos e Go Diva’s.

No concurso de disfraces, as persoas participantes debían fotografarse  cos  seus  disfraces  nalgunha  das salas museísticas municipais, o Centro  de Interpretación  da  Muralla,  MIHL, a Sala  de  Exposicións  Porta  Miñá  e o Centro Arqueolóxico de San Roque,  ou no C.S. O Vello Cárcere e enviar ata un máximo de tres fotos. Os gañadores foron Daniel Revuelta, Pilar Cabello, Elliane Álvarez, Valeria Fernández, Chloe Álvarez, Paula López e Santiago Tarrío.