Lugo, 30 de agosto de 2025. O Tenente Alcalde do Concello de Lugo, Rubén Arroxo, visitou o barrio de Recatelo onde a Tenencia de Alcaldía planifica continuar a traballar na mellora dos espazos públicos coa elaboración dun novo mural. Arroxo estivo acompañado polo muralista Rubén Paz e por veciños e veciñas do barrio para "avaliar os espazos e ter en conta as opinións da veciñanza". O novo mural será realizado en colaboración coa área de Cultura da Deputación Provincial.

Arroxo destacou o traballo realizado nos últimos anos coa transformación do barrio de Recatelo nun espazo máis humano e sostible. "Non só transformando o pavimento, senon renovando tamén as infraestruturas soterradas, incluíndo as redes de abastecemento e saneamento, instalando novo alumeado LED de baixo consumo e habilitando novas zonas con vexetación, que achegan sombra e confort durante os meses máis calorosos".

"A renovación de Recatelo foi concibida desde o principio como un proceso dialogado, e así o mantivemos con múltiples xuntanzas, e canles abertas coa veciñanza", afirmou Rubén Arroxo, que destacou que "seguiremos a colaborar coa veciñanza e a atender as distintas peticións que nos fagan chegar".

O traballo realizado en Recatelo consolidou este barrio como unha zona de paso estratéxica e de lecer, que conecta o casco histórico co Parque de Rosalía de Castro, nun modelo que prioriza a mobilidade peonil e mellora a calidade de vida no corazón da cidade.