Lugo, 14 de xullo de 2026. Rubén Arroxo, portavoz do BNG no Concello de Lugo, anunciou que o Bloque Nacionalista Galego rexistrará unha pregunta dirixida ao goberno municipal para coñecer que iniciativas levou a cabo a Concellería de Migración desde a constitución do novo executivo e cal é o plan de traballo previsto para os vindeiros meses. “A creación desta concellería respondía á realidade demográfica do noso concello e ás necesidades das persoas migrantes, pero transcorridos xa estes primeiros meses de mandato non coñecemos ningunha iniciativa posta en marcha”, afirmou o portavoz nacionalista.

O BNG lembrou que a creación dunha área específica de Migración debía servir para impulsar políticas de integración, acompañamento e atención ás persoas migrantes. “Porén, o único que coñecemos ata o momento é o abandono do proxecto da Casa do Migrante, sen que se teña presentado ningunha alternativa nin se informe de actuacións desenvolvidas desde esta concellería”, sinalou Arroxo.

“Lugo é hoxe unha cidade cunha realidade demográfica cada vez máis diversa, e as políticas municipais teñen que adaptarse a esa realidade”, afirmou Rubén Arroxo. Na actualidade conviven no municipio persoas de máis de cen nacionalidades e a poboación migrante representa máis do 15 % do padrón municipal. Nos últimos catro anos, o número de persoas nacidas noutros países seguiu a incrementar, o que evidencia a importancia de desenvolver este tipo de políticas de integración.

A través desta iniciativa, o BNG preguntará ao goberno municipal cales foron as actuacións executadas pola Concellería de Migración desde a constitución do goberno e tamén cal é a planificación prevista para os próximos meses. “Queremos saber se existe un proxecto real para esta área ou se a creación da concellería quedou nun simple anuncio sen contido”, indicou Arroxo.

O portavoz do BNG incidiu en que “Lugo é unha cidade cada vez máis diversa e necesita políticas públicas que dean resposta ás necesidades das persoas migrantes, favorecendo a súa integración e garantindo a igualdade de oportunidades”. Neste sentido, criticou que “o goberno do PP non está a ofrecer información sobre o traballo desta concellería nin sobre os obxectivos que pretende acadar”.

Arroxo concluíu asegurando que non abonda con crear unha concellería, senón que é necesario dotala de contido, recursos e planificación. "A veciñanza ten dereito a saber que se está facendo desde unha área creada precisamente para responder a unha realidade social cada vez máis importante na nosa cidade”.