Lugo, 07 de maio de 2021. O Portavoz do BNG de Lugo, Rubén Arroxo, anunciou que vén de presentar unha proposición para o vindeiro pleno municipal na que defenderá unha nova regulación eléctrica, pensada para as veciños e veciñas da Galiza. Rubén Arroxo explicou que “coa nova tarifa imposta polo goberno do Estado, a maioría dos e das consumidoras imos ter un aumento nos custes cunha tarifa que condiciona un posible aforro na factura a un cambio nos hábitos de vida”.

 “Se unha familia non quere pagar máis pola luz, ten que poñer a lavadora, usar a prancha, poñer o lavalouzas usar o forno ou facer calquera tarefa que supoña consumo eléctrico a partir das doce da noite, iso non é compatible co descanso nin coa conciliación”, asegurou Rubén Arroxo, que engadiu “sendo Galiza produtora electricidade, é preciso que as familias e  empresas galegas teñan beneficios e deixen de pagar a factura máis cara”.

Xunto coa posta en marcha dunha tarifa eléctrica galega, a proposta do BNG defende un IVE super-reducido do 4% en lugar do 21% que se aplica agora, “porque é un servizo básico e non un artigo de luxo”, segundo declarou Rubén arroxo, así como a supresión do imposto especial de electricidade.