Lugo, 6 de novembro de 2018. O BNG denuncia a falta de atención á limpeza no rural. Rubén Arroxo puxo como exemplo o caso da parroquia de Nadela, onde os contedores levan máis de 2 semanas sen baleirar “neste momento a veciñanza púxose en contacto con nós por que o lixo rodea os contedores e a empresa de recollida non pasa por alí”. Para o BNG “non é entendible”  que a empresa adxudicataria manteña este comportamento e dende o concello “se faga a vista gorda”.

“O goberno local non está vixiando que a URBASER cumpra cos compromisos, estamos descubrindo datos moi relevantes” afirmou Arroxo e avanzou que “nestes días poñermos máis cousas enriba da mesa no referente aos incumprimentos contractuais da empresa e cos que o goberno do PSOE está a facer a vista gorda”.

O 31 de marzo do 2017 caducou o contrato do servizo de limpeza viaria, recollida de lixo e transporte, polo que xa pasou máis de ano e medio. A este respecto cómpre lembrar que no mes de xuño do ano 2016 o BNG presentou unha proposición plenaria, que foi aprobada por unanimidade, solicitando a municipalización do servizo, resaltando ademais ao respecto (tal e como se pode ver nas actas dese pleno) que é preciso dar axilidade para evitar que o contrato caduque sen ter prevista unha solución.