Lugo, 11 de marzo de 2022. O Tenente Alcalde e concelleiro de Mobilidade e Infraestruturas, Rubén Arroxo, anunciou a intervención que está a realizar o Concello de Lugo en colaboración con BEGASA. Arroxo explicou que “continuamos a avanzar na mellora da imaxe da cidade soterrando os cruces do cableado da rede de alumeado público do Concello”.

A actuación estase realizando nos cruces do cableado das rúas Galiza e Celso Emilio Ferreiro, e na praza de Bretaña, “tres cruces de cables que nos vindeiros días deixarán de existir, seguindo coa liña de traballo na que estamos a avanzar desde o Goberno de Lugo”, afirmou o Tenente Alcalde, que explicou “este tipo de actuacións requiren de trámites complexos, ao requerirse do traballo en conxunto do Concello e das compañías responsábeis do cableado tanto eléctrico como de telecomunicacións”.

O Goberno de Lugo realizou diversas actuacións deste tipo nos últimos meses. Rubén Arroxo lembrou que “ao mesmo tempo que se renovaba o alumeado no Grupo da Paz preparouse a zona para soterrar os cruces do cableado, acción que se executará nas vindeiras semanas”.