Lugo, 23 de agosto de 2023. O Tenente Alcalde do Concello de Lugo, Rubén Arroxo explicou que nas vindeiras actuacións na vía pública, o Goberno traballará para "crear zonas de sombra en todos os barrios, garantindo que nas xornadas máis calurosas do verán a temperatura nas rúas sexa agradable". Rubén Arroxo explicou que o obxectivo da Tenencia de Alcaldía é de plantar "máis de 500 árbores na vía pública, mellorando a sensación térmica ao andar pola rúa e convertendo á cidade nun gran pulmón verde"

"A situación climática require de accións importantes a nivel global, mais é preciso tamén traballar a pequena escala desde os concellos e cada persoa de xeito individual para tratar de reducir as consecuencias que xa estamos a ver", afirmou Rubén Arroxo, que engadiu "estamos afrontando os días máis calurosos do verán, unha xornada na que se moitas veciñas e veciños desfutan das zonas de sombra que xa se habilitaron nos últimos anos".

"Rúas como a zona peonil de Camiño Real, Gallego Tato ou Aquilino Iglesia Alvariño son o exemplo de que se poden crear zonas de sombra no tecido urbano, garantindo o benestar das veciñas e veciños", explicou Arroxo, que fixo balance das actuacións realizadas no último mandato, con máis de 200 novas árbores plantadas no tecido urbano. As novas rúas con máis masa arbórea son a praza da Mosqueira, con 20 novas árbores, Lamas de Prado con 40 e Aquilino Iglesia Alvariño e Gallego Tato con 30 árbores en cada unha. No resto de zonas renovadas polo Goberno de Lugo tamén se aumentou a cantidade de árbores, plantando 6 no treito final de Camiño Real e no novo treito de mediana de Fontiñas, 8 no cruce das rúas Río Sil e Conde e en Quiroga Ballesteros, ou dúas na praza do Sagrado Corazón, "onde non se puideron colocar máis debido á situación da propia praza", explicou Arroxo.

Á hora de renovar as rúas da cidade, a Tenencia de Alcaldía busca sempre garantir un mellor acondicionamento ambiental, habilitando sempre que é posible novas verdes con árbores e arbustos, "avanzando para que Lugo sexa cidade deseñada para o desfrute das persoas", explicou Arroxo, que engadiu "agardamos que o resto de administracións aposten tamén polo aumento de zonas verdes ao planificar actuacións en Lugo".