O BNG presenta unha Ordenanza Cívica para Cargos Públicos
A Ordenanza, presentada por Rubén Arroxo, recolle a prohibición de que se circule e estacionen coches oficiais, que unicamente transporten autoridades, nas zonas peonís
Con esta proposta o BNG-AA fai unha emenda á totalidade da Ordenanza Cívica presentada recentemente pola alcaldesa e que PP e Cidadáns están dispostos a aprobar
Lugo, 8 de maio de 2018. Rubén Arroxo anunciou que o BNG-AA presentará este documento como unha emenda á totalidade da Ordenanza de Civismo presentada pola Alcaldesa, na vindeira mesa de ordenanzas. O modelo de Ordenanza Cívica para Cargos Públicos presentado polo BNG-AA recolle un total de 59 artigos que recollen obrigas e prohibicións a respecto das responsabilidades dos cargos públicos do concello de Lugo e doutras administracións. Rubén Arroxo sinalou que “o goberno municipal pretende criminalizar á veciñanza, pero nos lembramos que os cargos públicos teñen a súa responsabilidade”.
Na Ordenanza proposta polo BNG, que será emenda á proposta polo Goberno Municipal, proponse que en vez de aplicar sancións polo estacionamento indebido, os cargos públicos tomen medidas para crear as necesarias prazas de aparcamento e ordenar as existentes. “En vez de criminalizar a pobreza ou a quen exerce a prostitución débense aplicar políticas para que axudar ás persoas a saír desa situación” explicou Arroxo e sinalou “sancionase a quen fai a súas necesidade fisiolóxicas no espazo público, pero mantéñense pechados os baños públicos de varias prazas da cidade dende fai moitos anos”.
“A Ordenanza Municipal propón sancións para as nenas e nenos que xogan na rúa nós queremos que se creen espazos seguros para o ocio infantil e entendemos que os cargos públicos teñen a obriga de atender esta necesidade” afirmou Arroxo. Nos 59 artigos desta ordenanza presentada polo BNG-AA recóllense obrigas, prohibicións e boas prácticas para cargos públicos.
O coche da alcaldesa non poderá aparcar nin circular por zona peonís
Entre as prohibicións recollidas está o estacionamento de vehículos oficiais en zonas peonís cando estes sexan para o uso do desprazamento de cargos públicos, e persoas con responsabilidades de xestión e goberno do Concello de Lugo ou de calquera outra administración. Rubén Arroxo puxo como exemplo a xestión da mobilidade na cidade de Pontevedra onde o alcalde foi o primeiro en dar exemplo ao resto de veciños e veciñas á hora de respectar as zona peonís.
