Lugo, 28 de marzo de 2025. A concelleira de Cultura, Turismo e Promoción da Lingua, Maite Ferreiro, acompañada pola Deputada Provincial responsábel da área de Cultura, Iria Castro, represerntantes da asociación cultural FACELA e representantes da Xunta de Galiza, presentaron a novena edición do festival FACELA Fest, o festival de música independente que conta coa colaboración da Tenencia de Alcaldía do Concello de Lugo a través da área de Cultura. "Seguimos apoiando un festival xa consolidado no calendario cultural de Lugo, que realiza unha importante aposta pola presenza das agrupacións lideradas por mulleres e polos grupos de Lugo", explicou Maite Ferreiro..

A deputada de Cultura, Iria Castro, valorou "o traballo da organización para incluír cada ano no cartel bandas emerxentes que nos sorprenden" e encadrou o apoio da Vicepresidencia da Deputación de Lugo ao festival na colaboración que mantemos co tecido cultural e asociativo de toda a provincia para contribuír a unha axenda ampla e variada de música en directo, que dea opcións ao pújblico e tamén ás bandas e artistas galegas e locais".

O FaCeLa Fest volverá este ano co Auditorio Municipal Gustavo Freire como escenario principal. O cartel deste ano volverá apostar por bandas míticas da escena independente, entre as que se atopan nomes como THE UNDERTONES (procedentes desde Irlanda do Norte), CHRISTINA ROSENVINGE, os xaponeses STOMPIN`RIFFRAFFS, que comparten cartel con bandas lucenses e galegas como JADE 4, GRANDE AMORE, LORAHACEPAM, LOS REVELATORS ou MOLOCH.

O Facela Fest é un festival de autor onde prima unha cousa por riba de todo: a calidade das bandas participantes. Un festival de música independente que se diferencia doutros festivais de música do País polo seu coidado e arriscado cartel. "Non é outro festival clónico, senón unha clara aposta pola diferenciación, coa cultura como eixo fundamental", afirmou Maite Ferreiro.