Lugo, 29 de marzo de 2025. O Tenente Alcalde, Rubén Arroxo, anunciou que a renovación do asfalto da Avenida da Coruña, no treito que discorre entre as rúas Perpetuo Socorro e Illas Cíes, comezará o vindeiro luns. Arroxo lembrou que a Tenencia de Alcaldía traballa para "atender ás reclamacións veciñais e mellorando as vías de toda a cidade, tanto en zonas urbanas como periurbanas".

Arroxo anunciou que o obxectivo é "executar os traballos afectando o mínimo posible ao tráfico, para o que se dividirá a actuación en dúas fases". Deste xeito, manterase sempre o sentido de circulación en ambos sentidos, habilitando itinerarios alternativos. Os traballos teñen unha duración estimada de unha semana.

Os vehículos con itinerario de acceso á cidade dende Avenida de A Coruña deberán tomar como vías alternativas os treitos de:
- Rúa Monte Faro e Avenida Infanta Elena.
- Avenida Reverendo Xosé Fernández Núñez, Rúa Alfredo Vila, Rúa Currros
Enríquez e Rúa do Camiño Real.
- Rúa Illas Cíes, Rúa Alexandre Bóveda e Rúa Otero Pedrayo.

Para mellor adecuación e menor afección ás liñas de bus urbano, terase que manter en todo momento a posibilidade de xiro á esquerda en Avenida de A Coruña cara a Rúa Illas Cíes. Para tal motivo restrinxirase o estacionamento nas primeiras prazas de aparcamento desta rúa, durante todo o tempo que duren as obras.

Do mesmo xeito para mellorar as manobras de xiro de autobuses urbanos en Rúa
Poeta Curros Enríquez cara Rúa do Camiño Real, restrinxirase tamén o
estacionamento nas primeiras prazas de aparcamento do marxe dereito desta rúa,
durante todo o tempo que duren as obras.

As Rúas Mallorca, San Lourenzo e Perpetuo Socorro terán restrinxido o seu
acceso a residentes, quedando estas sen saída cara á Avenida de A Coruña por
mor dos traballos, dispoñéndose de dobre sentido de circulación para dar acceso e saída eventuais a estes residentes.

Os traballos consistirán an na creación dunha nova capa de rodadura baseada en mestura asfáltica en quente, o que asegurará o selado do firme ante a acción da auga superficial, garantindo que a intervención sexa duradeira. Unha vez rematado o asfaltado, renovarase a sinalización horizontal.