Lugo, 30 de marzo de 2025. A concelleira de Cultura, Turismo e Promoción da Lingua, Maite Ferreiro, e a edil de Educación e Difusión do Coñecemento, Iria Buide, recibiron no Concello a integrantes da Asociación Socio-Educativa Antonio Gandoi. No encontro, avaliaron as necesidades desta asociación "para seguir a manter as vías de colaboración que mantivemos desde o Concello de Lugo nos últimos anos", afirmou Iria Buide, que destacou que esta asociación "é un piar importante da programación da Tenencia de Alcaldía, ao colaborar en distintos eventos ao longo do ano".

Nos útlimos anos, a Tenencia de Alcaldía realizou "un importante esforzo" para mellorar as instalacións que utiliza a asociación para a súa actividade no barrio de Albeiros, renovando a cuberta do edificio e conseguindo mellorar tanto a eficiencia enerxética das instalacións como para reducir os custes que o Concello afronta en mantemento. A concellería de Educación investiu preto de 40.000 euros nesta actuación, executada no pasado mandato.

A Asociación Socio-Educativa Antonio Gandoi ten como fins primordiais defender e reivindicar a importancia educativa da familia nos primeiros anos, así como un compromiso firme coa lingua, a cultura, a contorna e o saber propios como bens imprescindibles para o desenvolvemento da persoa. A Asociación busca contribuír ao óptimo desenvolvemento dunha práctica parental positiva, utilizando o fogar como o primeiro e máis importante ambiente de aprendizaxe.