Lugo, 27 de marzo de 2025. A área de de Cultura, Turismo e Promoción da Lingua, celebra o Día Mundial do Teatro que se celebra hoxe cunha nova representación da 25ª Mostra de Teatro Clásico. Hoxe, 27 de marzo, a obra "Casa de Muñecas" de Secuencia 3 Artes Comunicación chega ao Auditorio Municipal Gustavo Freire. Dirixida por Lautaro Perotti e adaptada por Eduardo Galán, conta co elenco de María León, Santi Marín, Patxi Freytez, Pepa Gracia e Alejandro Bruni. Esta obra clásica de Henrik Ibsen explora a vida de Nora, que garda un segredo que ameaza a súa aparente felicidade matrimonial.

A XXV edición da Mostra de Teatro Clásico, que se desenvolve entre o 23 de febreiro e o 30 de marzo no Auditorio Municipal Gustavo Freire "conta cunha programación extensa e de calidade con 13 representacións teatrais de éxito de crítica e público", explicou a concelleira de Cultura, Maite Ferreiro, que engadiu "animamos a toda a veciñanza a desfrutar do teatro cunha programación extensa ao longo de todo o ano, neste mes de marzo, cunha programación adicada ao teatro clásico".

A Mostra de Teatro Clásico do 2025 destaca pola súa aposta polas compañías galegas que producen obras clásicas, así como pola presenza feminina nas actividades. Catro obras son integramente galegas, e dúas actividades están realizadas integramente por mulleres. As obras presentadas acumulan 7 premios de teatro a nivel galego e estatal.

As entradas para os espectáculos están dispoñibles a través do portal entradaslugo.es a un prezo de 8€ para público adulto e 3€ para espectáculos familiares. As persoas en paro, menores de 30 anos, pensionistas e actores asociados á AAAG poden desfrutar dun desconto do 30%.