Lugo, 06 de abril de 2022. O Tenente Alcalde e responsábel da área de Mobilidade, Rubén Arroxo, xunto co edil de Infraestruturas Urbanas, Alexandre Penas e o concelleiro de Educación, Felipe Rivas, visitaron a rúa Sanxillao onde se está a levar a cabo a renovación da pavimentación da zona.  O Tenente Alcalde destacou “o bo ritmo que están a levar os traballos”, e explicou “estase a traballar na pavimentación da zona, e nos vindeiros días renovarase a sinalización, permitindo que en poucas semanas as veciñas e veciños poidan desfrutar desta zona completamente renovada”.

Arroxo explicou que “no treito máis ancho da rúa estase a renovar o pavimento, que estaba moi desgastado e na zona máis estreita continuamos avanzando coa instalación dunha zona con plataforma única, aumentando a seguridade peonil nesta zona”.

Despois desta renovación, contarase cunha plataforma única cuxo acabado resalta o carácter de preferencia peonil da rúa. Esta zona conta con cores diferenciadas para a zona peonil e a zona de paso de vehículos. O treito de plataforma única estará limitado a 20 Km/h e instalaranse elementos que permitirán o calmado do tráfico.

O Goberno de Lugo continúa a planificar melloras na convivencia do tráfico e dos pasos peonís. “O modelo de plataforma única demostrou a súa viabilidade en zonas estreitas, cuxo ancho non permite instalar beirarrúas que cumplan os requisitos esixidos pola lexislación”, explicou o Tenente Alcalde.

Ademais da rúa Sanxillao, o Goberno de Lugo está a executar as obras para habilitar unha plataforma única na zona de Fingoi de Abaixo.