Lugo, 2 de febreiro de 2019. O voceiro do BNG no concello de Lugo, Rubén Arroxo anunciou o comenzo dunha serie de comisións abertas para a elaboración do programa electoral do BNG. Arroxo explicou que se desenvolverán un total de seis xuntanzas, dividas en bloques temáticos. As xuntanzas terán lugar no local comarcal do BNG e desenvolveranse entre o 4 e o 11 de febreiro. Arroxo sinalou que “queremos que participen todas as persoas que lle queren a esta cidade e que desexan un cambio para que Lugo funcione ”

O voceiro do BNG e candidato á alcaldía tamén sinalou que “establecemos diversos medios dixitais para que a xente faga aportacións, este ano puxemos en marcha unha APP para dispositivos móviles, que está a ter moito éxito entre a mocidade, a través da cal nos están chegando moitas propostas para mellorar a cidade”. O BNG ten aberta unha liña de whatsapp, o correo electrónico, e contas nas redes sociais de Instagram, Facebook e Twiitter “realmente as redes sociais funcionan como unha grande comisión aberta permanente onde mantemos contacto con moitas e moitos veciños de Lugo que nos fan achegas constantemente”.

A realización desta serie de comisión definiuse nunha xuntanza na que participaron integrantes da candidatura do BNG ás eleccións municipais e persoas que forman parte do Consello Local do BNG. Rubén Arroxo animou a “participar e a propoñer por que construír o Lugo do futuro é cousa de todas e todos” As comisións para a elaboración do programa de goberno estarán divididas en seis bloques temáticos e as datas de celebración serán as seguintes:

• Mocidade – 4 de febreiro ás 20:00 horas
• Igualdade - 5 de febreiro ás 19:00 horas
• Economía, emprego e servizos sociais - 5 de febreiro ás 20:00 horas
• Cultura, Patrimonio, Turismo, Educación e Lingua - 6 de febreiro ás 18:30 horas
• Deportes - 7 de febreiro ás 19:00 horas
• Urbanismo, Medio Ambiente, Infraestruturas, Rural e Mobilidade - 11 de febreiro ás 19:30 horas