Lugo, 22 de setembro de 2020. O Tenente de Alcalde e concelleiro de Mobilidade e Infraestruturas, Rubén Arroxo, xunto co edil de Educación e Difusión do Coñecemento, Felipe Rivas, presentaron os avances que desde ambas concellerías se teñen realizado de cara á posta en funcionamento de vieiros escolares. Segundo Felipe Rivas “aproveitando a celebración do Día Europeo sen Coches, quixemos facer fincapé na necesidade de usar medios de transporte alternativos ao vehículo privado”.

Para o concelleiro de Eduación, “estamos a preparar plans piloto para poñer en marcha nas vindeiras semanas, para, coa experiencia que gañemos durante o inicio destes plans, tratar de activar vieiros escolares en todos os centros durante o presente curso”. “Trátase dun traballo que temos que realizar en conxunto desde o concello coa colaboración dos centros de ensino e das familias”, afirmou Felipe Rivas.

A posta en marcha dos vieiros escolares implica tamén “un cambio nas tendencias da mobilidade, reducíndose o uso do vehículo privado”, explicou Felipe Rivas, que afirmou que “en todas as cidades nas que se promoveron, vimos como se eliminaron os problemas de tráfico nas entradas e saídas dos centros de ensino que actualmente podemos ver en Lugo”.