Lugo, 28 de xuño de 2023. O candidato do BNG ao Congreso por Lugo, Daniel Castro, visitou unha explotación gandeira en Friol e sinalou que “existen diversas posibilidades de produción agrogandeira no país con moita xente disposta a implicarse”. Castro coñeceu de primeira man as particularidades deste sector, e afirmou que “as distintas administracións teñen que facilitar o asentamento de poboación e o emprendemento no rural, garantindo o acceso aos servizos básicos de xeito similar á cidade”.

O BNG traballará no Congreso cun grupo galego forte para rematar coa discriminación que sofren as labregas e labregos galegos co apoio público estatal á actividade agraria. Daniel Castro afirmou que “defenderemos que as axudas ás explotacións da Galiza se adecúen ao modelo de produción específico do noso país”. O BNG apostará tamén por apoiar os circuítos curtos de comercialización e de transformación por parte dos e das propias produtoras e e apostar pola produción diferenciada e de calidade.

“Son moitos os sectores afectados polas políticas deseñadas dende Madrid e sen contar coas persoas de aquí, que so pretenden vivir do seu traballo cuns prezos dignos”, explicou Daniel Castro, que engadiu “precisamos dunha voz en Madrid que defenda os nosos sectores productivos para poder seguir producindo e mantendo vivo o noso rural”.