Lugo, 18 de febreiro de 2023. Un ano máis polo sábado de Entroido celebrouse o tradicional concurso de disfraces infantil organizado pola Área de Cultura, Turismo e Promoción da Lingua. O bo tempo acompañou á tarde festiva e os concursantes despregaron a súas dotes imaxinativas con vistosas creacións nun desfile seguido por numerosas veciñas e veciños.

A festa non faltou durante un desfile moi animado con celebradas coreografías que abrangueron desde o último tema de Bizarrap e Shakira ata a música dos 80. Os participantes fixeron gala de gran imaxinación con elaborados traballos como o equipo V, as Tartarugas Ninja ou a familia Bros. Nas personaxes nas que se inspiraron os nenos lucenses tivo un enorme peso a exploración espacial, con ata 3 disfraces distintos. O cine tamén foi fonte de inspiración e non faltou a familia Addams, a ourizo de Canta 2 ou os Dálmatas. Durante a deliberación do xurado, formado por Lourdes Abuide, xornalista, Iago Eireos, artista gráfico e Cruz Lago, profesor da EASD Ramón Falcón, a festa continuou cun desfile no que participaron todas as nenas e nenos que acudiron disfrazadas mais que non participaron no concurso.

O concurso comezou coa categoría de disfraces individuais na que se inscribiron quince persoas. Nesta categoría establecéronse tres premios e os agraciados foron os seguintes:

1. Bender, 11 anos cun premio por valor de 100€
2. A palomiteira festeira, de 10 anos cun premio por valor de 80€
3. Puchos Tolos, 5 anos, cun premio por valor de 50€

Na categoría de disfraces por parellas foron cinco as que decidiron presentarse, entre as que se repartiron os seguintes premios: 

1. Mércores e a súa cousa (Ariadna e Naiara Fernández, de 10 e 6 anos) cun premio por valor de 150€
2. A Música dos 80 (Bruno e Xoel Otero, 8 e 5 anos) cun premio por valor de 120€ 
3. Ensalada (5 e 6 anos) cun premio por valor de 90€

O desfile rematou co paseo das nove comparsas que se presentaron. Ducias de nenos e nenas participaron nesta categoría que resultou por momentos moi espectacular debido aos elaborados e orixinais traxes deseñados, así como polas animadas coreografías.

Os premios repartíronse do seguinte xeito: 

1. As variñas Tolas, con 9 compoñentes a partir de 4 anos, cun premio por valor de 240€
2. Space Cookies, con 5 compoñentes entre 4 e 7 anos, cun premio por valor de 180€
3. Cuesta abajo y sin frenos, con 12 compoñentes a partir de 3 anosm cun premio por valor de 140€

Os premios consisten en dous vales, un que pode ser canxeado por libros ou material escolar e outro para canxear en actividades culturais e de lecer.

Listado completo dos participantes no Gran Concurso de Disfraces Infantil

Individual

• A Peliqueira Lixeira
• Hai unha galega na Lúa
• Familia Bros.
• Ash, a ourizo de Canta 2
• O pequeno apagalumes
• Eco-Robots
• O Pirata
• Adestrador Pokémon
• Puchos Tolos
• Bender
• A Palomiteira Festeira
• Poppy Play Time
• Billy Saw
• Galicia
• Tartaruga Ninja

Parellas

• A música dos 80
• Mércores e a súa cousa
• As guacamaias Pichi e Perla
• Fantasía Animal
• Ensalada

Comparsas

• Space Cookies
• Nasa Star
• As variñas tolas
• Equipo V
• 53 Dálmatas
• Shakira: BZRP Music Sessions, Vol 53
• Rescatando ao rescate
• Galácticos futuristas
• Costa abaixo e sen freos