Lugo, 13 de outubro, 2016. O BNG - AA presentará unha pregunta formal, ao goberno municipal, para obter información sobre os horarios de traballo que están a prestar os vixiantes de seguridade contratados pola empresa ALCOR que traballan nas instalacións municipais. Rubén Arroxo dixo que “o BNG-AA velará para que se controle ás empresas concesionarias e que non violen os dereitos laborais” e engadiu que “o conflito laboral amosa que esta empresa non está a cumprir cos traballadores”.

“As mobilizacións de traballadores da empresa ALCOR demostra que existen irregularidades e esta empresa xa estivo baixo sospeita en diferentes ocasións polo incumprimento cos seus traballadores” afirmou o voceiro do BNG-AA no concello de Lugo. Para os nacionalistas “o goberno debería facer un especial control sobre este tipo de empresas que, a pesares de gañar os concursos públicos, teñen un amplo historial de incumprimentos cos dereitos laborais”.

Rubén Arroxo anunciou “imos pedirlle ao goberno municipal que lle reclame á empresa ALCOR un informe sobre o tempo que está a traballar cada traballador e o número de horas extras que se lles retribúen”. Para o BNG – AA “o goberno municipal, ademais de anunciar cláusulas sociais nos contratos, ten que facer un seguimento do que sucede en realidade cos traballadores que prestan servizo nas instalacións municipais”