Lugo acollerá 6 residencias artísticas de investigación dentro do ciclo Atopémonos bailando

Rubén Arroxo: “trátase dunha convocatoria aberta a todas as profesionais da danza e das artes do movemento para realizar proxectos na cidade durante este ano”

A área de Cultura consolida o seu apoio ao sector da danza con esta convocatoria que permitirá avanzar na investigación e na creación de proxectos e espectáculos

Lugo acollerá 6 residencias artísticas de investigación dentro do ciclo Atopémonos bailando

Lugo, 26 de abril de 2022. O Tenente Alcalde, Rubén Arroxo, presentou xunto con integrantes do  Colectivo Glovo e Jacobo Sutil, presidente da AGADIC os resultados do proceso selectivo de residencias artísticas e de investigación, que baixo o nome Atopémonos Bailando permitirá ás profesionais de danza e artes do movemento realizar as súas investigacións en Lugo entre os meses de maio e novembro.

En total, presentáronse 93 proxectos, 11 chegados de Portugal, 32 da Galiza e 50 do resto do estado. Os 6 proxectos escollidos realizarán as súas estadías en Lugo e realizarán unha actividade aberta.

Os proxectos escollidos son os seguintes:

·         Sofía Kafol – Portugal

·         Paula Quintas – Galiza

·         Lucía Marote – Madrid

·         Sabela Mendoza – Galiza

·         Alba González Herrera - Madrid

·         Sonsoles Cordón – Galiza

 “Con Atopémonos Bailando desde a área de Cultura do Concello de Lugo consolidamos o noso apoio ao sector da danza facendo fincapé con este proxecto na primeira fase de investigación e creación de espectáculos, xunto cos outros proxectos da cidade como poden ser o Festival Cartografía en Movemento e o Ciclo LED Lugo En Danza”, declarou Arroxo.

O proxecto Atopémonos Bailando ten como obxectivos impulsar e apoiar a creación e investigación en danza e artes do movemento de compañías de ámbito galego, estatal e internacional creando un espazo para a realización de residencias de creación e investigación, con especial atención ás creadoras de Galiza, e difundir e achegar os procesos de creación en danza contemporánea á veciñanza a través dunha programación de calidade, diversa, innovadora, internacional e gratuíta.

Toda a información pode atoparse na web  do proxecto, http://www.atopemonosbailando.com/

Lugo acollerá 6 residencias artísticas de investigación dentro do ciclo Atopémonos bailando