Lugo, 26 de marzo de 2025. A concelleira de Educación, Iria Buide, a edil de Cultura, Turismo e Promoción da Lingua, Maite Ferreiro, e a deputada de Cultura, Iria Castro, asistiron esta mañá á xornada especial organizada pola Asociación Cultural e Pedagóxica Ponte nas Ondas en Lugo. O evento, celebrado no Auditorio Fuxan os Ventos, enmárcase dentro do programa do 30º aniversario desta iniciativa e contou coa participación de alumnado e profesorado de diversos centros educativos da cidade e da provincia.

Durante a xornada, destacouse a importancia da radio escolar como ferramenta educativa e o seu papel fundamental na preservación e difusión do patrimonio cultural inmaterial galego-portugués. A iniciativa forma parte da maratón radiofónica que se está a desenvolver de maneira simultánea en distintos puntos de Galicia e Portugal, coa participación de 250 persoas entre alumnado e profesorado só en Lugo.

Os centros educativos representados inclúen o CEIP Sagrado Corazón, o IES Lucus Augusti, o IES Muralla Romana, o IES Leiras Pulpeiro e a Escola Oficial de Idiomas de Lugo, entre outros. Ademais das intervencións dos centros participantes, o evento contou coa actuación de Antón Castro, integrante de Fuxan Os Ventos, e do grupo Troupelear, formado por Branca Villares e Pablo Pintor, que puxeron a nota musical á celebración.