Lugo, 24 de outubro de 2018. Ediles do BNG mantiveron xuntanzas coa Directiva da Escola Municipal de Música e coa Directiva da Asociación de Usuarios da Escola de Música para “coñecer a opinión e propostas das persoas que son directamente afectadas pola sentencia e que non se están tendo en conta”. Arroxo foi contundente, ante os rumores dunha posible privatización da Escola, “o BNG non vai permitir que se privatice o último é máis exitoso servizo público creado neste concello”.

Arroxo lembrou que “o BNG sempre apostou por unha modificación parcial da RPT para dar saída á actual situación que pon en perigo a continuidade da Escola Muncipal de Música e dos postos de traballo de docentes que tamén forman parte da Banda de Música” e engadiu que “a posibilidade dunha privatización da Escola Música sería inaceptable”.

Arroxo lembrou que Escola Municipal de Música foi posta en marcha no ano 2012 cando o BNG tiña responsabilidades de goberno e no momento da posta en marcha “houbo un acordo unánime das forzas políticas e sindicais para que a Escola empezase a funcionar”. Arroxo sinalou que “o problema da Escola non é o seu funcionamento, que é exemplar, se non cuestión técnico-administrarivas que o goberno municipal debe solventar”.

Rubén Arroxo sinalou que “está claro que o goberno municipal ten que ter a valentía política suficiente e aportar solucións para garantir a continuidade da Escola de Municipal de Música como o servizo público que é neste momento”. Dende o BNG xa se avanzou que “non imos permitir unha privatización da Escola de Música”. Arroxo advertiu “estaremos moi atentos a todos os pasos que se dan dende o goberno municipal, e entendemos que non se pode ir cara a privatización da Escola que foi, ata agora, exemplo de funcionamento do que debe ser un servizo público municipal”.