Lugo, 9 de xuño 2017. A edil do BNG-AA, Maite Ferreiro, visitou os pantaláns instalados no río Miño na zona de As Saamasas. Ferreiro sinalou que entidades como o Clube Fluvial ou a propia Deputación instalan estruturas flotantes no río “mentres que o concello segue negándose a acometer a creación dunha zona pública de baño no Miño”. “Entendemos que todas as actuacións que se fan no río deben contar cos permisos necesarios” dixo Maite Ferreiro e lembrou que o BNG está a seguir un proceso administrativo na Confederación Hidrográfica Miño-Sil para demostrar que é posible contar coas autorizacións pertinentes para que Lugo conte cunha zona pública de baño.

Neste momento son varios os pantaláns que existen no río Miño entre a Ponte Romana e a zona de As Saamasas que permiten un acceso ao río para as distintas actividades para as que foron pensados “pero o goberno municipal é incapaz de dar solución a un problema que está latente dende que o BNG o propuxo formalmente non ano 2009” afirmou Ferreiro que lembrou as diferentes iniciativas que foron aprobadas en pleno e en comisión relativas á zona pública de baño nos últimos oito anos.

Ferreiro sinalou que “no mes de marzo o goberno municipal anunciou que iniciaría os trámites necesarios para que neste verán se puideran instalar piscinas flotantes nunha zona do río” e puntualizou “non se volveu saber nada das xestións do goberno, pero todo apunta a que un ano máis as lucenses e os lucenses non teremos un lugar apto para disfrutar do noso río”. Dende o BNG apuntouse “a presión mediatica” como a única ferramenta á que o goberno da resposta “respostas que despois non chegan a efectivizarse, por que en realidade nunca houbo vontade de facelas realidade”.

250.000 no orzamento

A edil do BNG lembrou que no orzamento, prorrogado do ano 2016, había unha partida específica de 250.000 euros para a zona pública de baño “que non se vai a utilizar igual que ven sucedendo nos últimos anos”. Esta partida orzamentaria quedara sen executar un ano máis, os lucenses seguiremos sen zona pública de baño e os cartos tampouco se utilizarán para cubrir outras das moitas necesidades que hai no concello de Lugo.