Rubén Arroxo: “Gallego Tato é un exemplo na mellora das zonas escolares que Lugo merece”

O Goberno de Lugo aprobou a licitación da peonalización de Gallego Tato

Esta actuación executarase nunha zona importante da cidade onde conflúen instalacións deportivas, centros de ensino, zonas verdes e o Centro Social da Piringalla

Rubén Arroxo: “Gallego Tato é un exemplo na mellora das zonas escolares que Lugo merece”

Lugo, 13 de xullo de 2021. O Tenente Alcalde, Rubén Arroxo, anunciou que a Xunta de Goberno celebrada hoxe aprobou a contratación da peonalización da rúa Gallego Tato, no barrio da Piringalla, avanzando nas actuacións nas contornas escolares. O Tenente Alcalde afirmou que “hai dous anos e medio comezamos a executar actuacións de calmado de tráfico nas contornas dos centros escolares, e agora continuamos coa mellora das zonas escolares cun novo plan de humanización que comezará no colexio Luís Pimentel”.

O Goberno de Lugo adxudicou os traballos cun orzamento de 235.950€, e un prazo de execución de 4 meses á empresa Portosar. Con esta actuación crearase unha nova zona de estancia, onde se instalarán bancos, mesas e fontes, xunto con árbores e arbustos, que xerará un ambiente máis saudable e con zonas de sombra no verán.

O proxecto de obra define a nova zona como oasis no tecido urbano, dado que propón a implantación de material vexetal como elemento acondicionador da nova zona, co obxectivo de mellorar a calidade ambiental na contorna do colexio.

Arroxo destacou que “este é o centro de ensino que conta con máis estudantes na cidade, e está situado nunha zona na que conflúen centros de ensino, instalacións deportivas e un centro social, polo que se fai necesario contar cun espazo humanizado para o desfrute da veciñanza”.

 “Este proxecto será o espello no que continuar avanzando na humanización dos centros de ensino, tal e como nos veñen solicitando tanto as directivas como as asociacións de nais e pais dos distintos centros”, explicou o Tenente Alcalde, que engadiu “seguiremos traballando para continuar a humanizar e embelecer a cidade creando espazos útiles para a as persoas”.

Rubén Arroxo: “Gallego Tato é un exemplo na mellora das zonas escolares que Lugo merece”