Lugo, 15 de xuño de 2020. Cúmprese un ano da toma de posesión da corporación municipal tras as eleccións municipais do ano 2019, unha toma de posesión que daría lugar a un acordo de goberno entre o BNG e o Partido Socialista. Dende a Tenencia de Alcaldía, Rubén Arroxo, valorou positivamente este ano transcurrido dende a conformación da corporación. Arroxo referiuse ao traballo feito dende ás áreas que dependen da Tenencia de Alcaldía e sinalou que “o goberno municipal é unha ferramenta ao servizo da veciñanza para que Lugo funcione”

“Un dos primeiros retos ao chegar ao goberno foi facer unhas festas do San Froilán á altura que Lugo merece e coido que o conseguimos” sinalou Rubén Arroxo que tamén lembrou “dende a área de Cultura deuse un importante pulo a actividade na cidade e estase a traballar man con man co tecido cultural da cidade”.

Arroxo gradeceu “o gran esforzo  do persoal municipal das distintas áreas de goberno”. “É destacable o traballo realizado polo persoal municipal nunha situación tan complicada como o estado de Alarma”, afirmou Rubén Arroxo, que engadiu “durante os días máis complicados da crise sanitaria avanzouse en proxectos importantes para a transformación de Lugo grazas ao traballo do persoal das distintas áreas de goberno”

Rubén Arroxo destacou tamén a colaboración dos grupos da oposición “que tiveron unha actitude propositiva en asuntos clave para a transformación de Lugo como a reformulación das liñas de bus”.

Segundo o Tenente de Alcalde, as propostas achegadas polas veciñas e veciños tamén foron importantes para a planificación do traballo desde as áreas dependentes da Tenencia de Alcaldía. “O goberno é unha ferramenta para mellorar o municipio e o noso afán é colaborar coas veciñas que nos presentan propostas” afirmou Rubén Arroxo.

Nas áreas que dependen da Tenencia de Alcaldía estanse a desenvolver importantes cuestións relacionadas coa mobilidade, entre elas, a peonalización de Quiroga Ballesteros ou o tramo da Ronda da Muralla da Mosqueira, “ou o peche dun carril da Ronda da Muralla que permitiu ás veciñas e veciños de Lugo gañar unha zona peonil de 2.5 Km e avanzar de cara a unha muralla sen coches”.

Ao respecto da área de Infraestruturas Urbanas, Rubén Arroxo lembrou “o traballo realizado nos distintos barrios, sempre actuando por igual en toda a cidade e procurando mellorar a calidade de vida de todas as veciñas e veciños”. “Ademais, realizaronse múltiples xestións para unificar contratos de mantemento, cuestións que quizais non sexan tan percibidas no día a día da veciñanza, pero que permitirán aforrar diñeiro público”, declarou Rubén Arroxo.

“Desde a área de Cultura, Turismo e Promoción da Lingua conseguiuse consolidar ao San Froilán como a gran festa do outono galego e darlle o protagonismo das festas aos grupos de Lugo”, afirmou Rubén Arroxo, que destacou “as distintas novas maneiras de sacar a cultura ás rúas para que chegue a todas as veciñas e veciños”. “O peso da área de Cultura volveuse moito máis importante durante o confinamento, con distintas iniciativas para facer os días na casa máis levadeiros, e propoñendo actividades, como o proxecto Tecendo Brincadeiras ou o ciclo Muralleando Sen Parar, que nas distintas fases da desescalada permitiron acceder a entretemento sen descoidar as medidas de seguridade indicadas polas autoridades sanitarias”, declarou Rubén Arroxo, que afirmou que “a campaña Lugo Km 100 poñerá a Lugo no mapa para as persoas que aposten polo turismo de interior”.

Na área de Participación e Servizos para a Veciñanza, Arroxo destacou “proxectos moi solicitados nos últimos tempos polas veciñas e veciños de Lugo, como a primeira ampliación do Cemiterio Municipal en máis de 10 anos ou o servizo de compra telefónica na praza de Abastos e no Mercado Municipal”.

Ao respecto da área de Educación e Difusión do Coñecemento, Arroxo resaltou “a ampliación do servizo de madrugadoras e madrugadores a todos os centros de ensino, unha solicitude moi demandada polas familias e que se poñerá en marcha a partir do curso 2020-2021”. “Ademais, a concellería de Educación reduciu os prazos de moitos trámites administrativos, como as axudas para material escolar, que permitiu que as librerías de Lugo tiveran acceso a máis de 30.000€ en moito menos tempo que en anos anteriores”.