Lugo, 30 de xuño de 2024. O concelleiro de Infraestruturas Urbanas, Alexandre Penas, anunciou que o vindeiro venres 5 de xullo comezarán os traballos de renovación do pavimento en distintos puntos da rúa Montero Ríos. Penas afirmou que esta intervención é importante "debido a que esta rúa mostra un avanzado estado de desgaste en diferentes puntos, polo que se fai precisa unha actuación que garanta o bo estado dos puntos que amosan máis desgaste".

Alexandre Penas explicou que "para realizar estes traballos é preciso unha previsión meteorolóxica favorable durante varios días para permitir que o novo asfalto asente e a intervención sexa duradeira", e anunciou que nos vindeiros días se sinalizará o itinerario alternativo "para que as veciñas e veciños da zona non perdan o acceso á súa rúa".

O concelleiro de Infraestruturas lembrou a importancia de que a veciñanza faga chegar as súas necesidades ás distintas áreas do goberno municipal. "As veciñas e veciños de cada zona saben de primeira man as necesidades da súa zona", explicou Alexandre Penas, que engadiu "moitas veces trátanse de pequenos arranxos, que a brigada municipal de obras trata de resolver no menor tempo posíbel para garantir o bo estado da cidade".