Dende o BNG – Asambleas Abertas sinalaron que o goberno municipal segue actuando sen falar coa xente e “por imperativo”

Rubén Arroxo e Maite Ferreiro mantiveron hoxe unha xuntanza con algúns dos placeiros que se verán afectados polas obras

Lugo, 14 de outubro 2015. Os ediles do BNG – Asembleas Abertas mantiveron hoxe unha xuntanza con algúns dos placeiros que se verán afectados polas obras de remodelación que o concello terá que executar antes de finais deste ano. Entre as reivindicacións das persoas afectadas está a de evitar que as obras se realicen nesta época do ano que é unha das de maior actividade na praza de Abastos e no Mercado Municipal por confluír a celebración de Todos os Santos, do Nadal e do Entroido.

Ferreiro explicou, tras a visita á praza de Abastos, que “os placeiros reclaman que lles deixen pasar as festas do nadal para executar as obras xa que é unha das épocas do ano nas que a actividade económica é maior”. A edil nacionalista anunciou que o BNG – Asembleas Abertas presentaralle, na vindeira Comisión de Desenvolvemento Económico, unha serie de preguntas para aclarar cal vai ser o plan de actuación do goberno municipal á hora de executar as obras.

Segundo explicou Maite Ferreiro “a falta de planificación impide a instalación de novos postos xa que fai dous anos que se están proxectando as obras e aínda non se concretou a posibilidade de substituír os postos ou modificar a súa propiedade”.  Ferreiro sinalou que “independentemente das liortas internas, que ten neste momento o PSOE, o goberno municipal ten que atender ás cuestións relativas ao funcionamento das instalacións do concello”.

Os nacionalistas manifestaron tamén a súa preocupación pola posible desaparición e peche de establecementos tanto na Praza de Abastos como no Mercado Municipal. “Algúns dos placeiros que tiñan contrato por dous anos non ten, neste momento, a posibilidade de prorrogar”. Neste momento non se respecta a antiguidade e aqueles que xa están establecidos teñen que competir coas novas propostas en subasta sen ter en conta a inversión que teñen feita nos postos que ocupan na actualidade.