Lugo, 17 de agosto de 2025. A concelleira de Educación e Difusión do Coñecemento, Iria Buide, anunciou que este luns abrirá o prazo para solicitar praza nos comedores escolares dos centros de ensino públicos de Lugo. Buide destacou que este servizo se prestará en todos os centros desde o 1º día de curso e lembrou que "desde a nosa chegada ao goberno conseguimos que todos os centros públicos de Lugo conten con servizo de madrugadoras e madrugadores, un servizo necesario para moitas familias debido ás súas xornadas laborais".

As inscricións para usuarios fixos no servizo poderá realizarse ata o 31 de agosto, mentres que as prazas para usuarios esporádicos poderán realizarse ata as 20:00 do día lectivo anterior. Os prezos son de 3.96€ ao día usuarios fixos do servizo de comedor (que poderán solicitar días soltos da semana ou os 5 días), mentres que para os esporádicos é de 5,06€. O servizo de madrugadoras e madrugadores conta cun prezo único de 1,98€ ao día e permite a entrada nos centros en diferentes quendas a partir das 7:30 da mañá. As familias poden obter máis información sobre os comedores escolares a través da páxina web do Concello de Lugo ou nas oficinas da concellería de Educación.

Unha vez pechado o prazo de solicitude de praza, e no caso de que as solicitudes de inscripción sexan maiores que a capacidade total do comedor, tódalas solicitudes recibidas serán baremadas para a admisión no servizo, tendo preferencia de entrada, seguindo esta orde:
1º - Solicitude de usuario fixo 5 días semanais
2º - Ambos proxenitores traballan en horario de comedor
3º - Familias monoparentais
4º - Irmáns
5º - Sorteo
Todas as solicitudes entregadas que non obtiveran praza, quedarán en lista de agarda ata que se produza unha vacante no servizo e irán entrando en orde seguindo os criterios anteriores.
Queda aberta a inscripción, durante o resto do curso, baremando cada mes, sempre que haxa prazas vacantes, e despois de que entrasen tódolos usuarios que realizaron a inscripción no primeiro prazo.