Lugo, 13 de setembro de 2022. Alexandre Penas, concelleiro de Infraestruturas Urbanas, xunto con Cristina López, responsábel da área de Participación, achegáronse ata o barrio da Cheda, onde o Goberno de Lugo vén de continuar cos traballos de mellora da contorna colocando novos bancos para a veciñanza.  O Goberno de Lugo vén de colocar novos bancos na contorna da Cheda, “unha actuación que mellora enormemente a calidade de vida da veciñanza do barrio da Cheda ao crear zonas de convivencia para as veciñas e veciños”, explicou o concelleiro.

Alexandre Penas lembrou os traballos xa executados polo goberno de Lugo nos últimos meses, entre os que destacan a renovación do alumeado público ou a actuación integral executada na pavimentación de varias vías do barrio, feita no ano 2020, e que se completou no 2021 coa renovación das beirarrúas do barrio.

Alexandre Penas lembrou que “desde o Goberno de Lugo traballamos na atención aos distintos barrios, atendendo ás peticións das veciñas e veciños sobre as zonas nas que desenvolven a súa vida”. “As peticións da veciñanza, xunto coas visitas que realizamos por toda a cidade permítennos planificar o traballo que realizamos, buscando mellorar a calidade de vida  e o benestar das veciñas e veciños”, afirmou o edil de Infraestruturas.