Lugo, 10 de decembro de 2020. Hoxe inaugurouse na Sala de exposicións temporais do MIHL, a exposición Combate Mural. “Muller, Igualdade e Empoderamento”. Esta exposición, nace da expectación xerada polos traballos realizados ao longo do I Combate Mural dentro dos actos do Festival Culturbán.

O combate mural urbano que vivimos en Lugo consistía no desenvolvemento dun certame artístico ao aire libre e en directo, no que as persoas participantes contaban cos mesmos medios, mesmo tempo e mesmo tema sobre o soporte mural urbano que nesta ocasión foi “Muller, igualdade e empoderamento”. Trátase, por tanto, dunha fórmula de interacción global coa cidade e cos seus barrios, tanto a nivel urbanístico como social.

O edil de educación e difusión do coñecemento Felipe Rivas sinalou “nesta exposición a cidadanía que non puido achegarse a desfrutar do combate mural en directo ou aqueles que viviron a experiencia do proceso de creación pero non viron o resultado final poderán gozar da calidade dos traballos realizados polas artistas participantes”.

A exposición é o reflexo da esencia do Festival Culturbán no que se amosarán as propostas artísticas vangardistas, participativas e impactantes de artistas e colectivos artísticos urbanos do panorama nacional e internacional.

En palabras de Felipe Rivas: “Todas estas artistas fixeron das nosas rúas o mellor taller de traballo, o mellor lenzo e a mellor galería durante a creación e agora para a súa exhibición queremos que ese arte que naceu na rúa chegue aos nosos museos e se estableza unha comunicación entre público, artistas e museos axudando á dignificación da arte urbana como expresión artística e ferramenta lúdica, respectando e enriquecendo a identidade e o patrimonio urbano. E fomentando o diálogo e o encontro social, a través da arte e dos museos”.

A exposición contará coas obras de Ana Santiso, Jojo, Davixino, Tamara Baz, Elara Elvira, Blanca Escrigas, Miguel Anxo Macía, Iván Mouronte, Sergio Otre, e Xandre Otero e das fotografías de Pepe Saavedra, Bego Pérez e Marcos López que recollen todo o acontecido durante ese día.

Esta exposición inclúe tamén a realización dun obradoiro de arte urbano para nenos e nenas que se realizará no propio MIHL e para o cal nas redes de cultura e do propio MIHL poñeremos proximamente as datas e horarios definitivos así como o xeito de apuntarse para poder participar do mesmo.