Lugo, 11 de decembro 2016. Ante o recente anuncio dado polo goberno municipal da ampliación das redes de saneamento e abastecemento de augas en diferentes parroquias no rural, o BNG esixe ao goberno que non quede “en papel mollado” e que actúen con seriedade á hora de facer determinados anuncios. Estas afirmacións feitas polo portavoz do BNG débense a que na súa opinión o goberno municipal leva anos anunciando ou prometendo ás veciñas e veciños das parroquias, obras deste tipo que nunca se chegan a executar “Nalgunhas parroquias xa se anunciou varias veces que se ían executar servizos de abastecemento de auga ou de saneamento, que despois se perderon polo camiño” sinalou Rubén Arroxo.

O BNG puxo os exemplos de Orbazai e Adai onde sendo Orozco alcalde de Lugo, o goberno municipal comprometeuse a darlles un servizo que aínda non teñen, malia ter os depósitos e a potabilizadora respectivamente nas súas parroquias. O mesmo acontece con outras parroquias como poida ser San Xoán de Pena, onde tamén recibiron promesas para estar dotados de saneamento e a día de hoxe hai varios núcleos, que estando a escasos metros da depuradora, aínda non o teñen.

O concelleiro nacionalista volveu criticar que a alcaldesa preferise cartearse con Feijóo a sentarse a negociar “temos un presidente da Xunta de Galiza que mira para outro lado cando lle falan de Lugo, e se non se lle presiona con seriedade para que dunha vez colabore economicamente de cara a resolver o saneamento e abastecemento no rural, as parroquias de Lugo seguirán esquecidas”