A voceira do BNG marchou da xuntanza da comisión polo seu desacordo co xeito de actuar do goberno municipal “convocando xuntanzas sen contido nas que xa todo está decidido”

“O BNG quere unhas festas feitas coa participación da xente” dixo Paz Abraira

Lugo, a 12 de agosto de 2014. A voceira do BNG abandonou hoxe a xuntanza da comisión de festas por estar en desacordo coas formas utilizadas polo goberno municipal. Ao comenzo da xuntanza Paz Abraira lembroulle á edil de cultura cales eran os mecanismos para a elección do pregoeiro e da persoa oferente da ofrenda a Rosalía. Ante a falta de consideración, por parte da edil de cultura, que “fixo ouvidos xordos” a edil nacionalista abandonou a xuntanza. O BNG xa criticara que o goberno socialista no estableza cauces participación da xente e dos grupos políticos á hora de facer propostas para estas festas que, lembrou, "son organizadas por unha asistencia técnica que lle custa 10.000 euros ao concello".

Paz Abraira dixo que abandonara a xuntanza da comisión de festas “despois de constantar que non serve absolutamente para nada”. Abraira explicou que “cada ano é un grupo político quen fai a proposta do pregoeiro e da persoa oferente no acto de ofrenda a Rosalía de Castro” pero “esta proposta debe ser aprobada na comisión de festas”. Abraira sinalou que “a edil de cultura, sen respetar a comisión nen á corporación, xa tiña decidido que persoas serían as encargadas do pregón e da ofrenda a Rosalía e somentes convoca a xuntanza para comunicalo”.

Abraira lembrou que “o BNG fixo as festas, no seu momento, buscando a participación dos grupos políticos e dos cidadáns”. “Cando o BNG tivo a responsabilidade de organizar as festas do San Froilán tivéronse en conta propostas dos grupos políticos e abríronse canles de participación para que a xente fixera propostas, tanto á hora de elixir o cartel anunciador das festas como á hora de elixir os grupos que actuarían nas festas” afirmou Paz Abraira.