Bieito Lobeira: “Digna Lagarón é a mellor aposta para crear un novo concello aberto e transparente que traballe man a man coa veciñanza de Castro de Rei”

Castro de Rei, 2 de maio de 2015.- OBNG-Asembleas Abertas presentou en Castro de Rei a candidatura ás eleccións municipais do 24 de maio, encabezada por Digna Lagarón Doval, celadora do SERGAS, actualmente desempregada, e activista na Plataforma de Afectadas e Afectados polas Preferentes de Lugo. No acto de presentación, que tivo lugar no restaurante A Carballeira, participaron tamén o actual voceiro municipal do BNG, Jorge Balado, a nº 2 da candidatura, Olga García, e o Secretario Nacional de Organización do BNG, Bieito Lobeira.

A candidata nacionalista destacou que a do BNG-Asembleas Abertas é “unha candidatura renovada, preparada, seria e cohesionada. Mulleres e homes con ilusión por poñer o Concello de Castro de Rei ao servizo da súa veciñanza”.

Bieito Lobeira resaltou a valía desta candidatura, cun equipo de xente que quere traballar por un Castro de Rei diferente. “Un concello aberto, un concello transparente, ben xestionado, habitable, con proxectos de futuro e un concello que traballa man a man cos veciños e veciñas”. O obxectivo é democratizar o concello e abrilo á veciñanza, “gobernando para todos e todas e non só para uns poucos, tal e como nos ten afeitos o PP”.

Neste sentido, Lobeira presentou a Digna Lagarón como “a mellor aposta para crear un novo concello aberto e transparente que traballe man a man coa veciñanza de Castro de Rei”. Todo o contrario, dixo, á parálise absoluta na que está sumido o municipio durante todos estes anos de goberno do PP, “unha xestión que está sendo totalmente nula, con cero accións, cero investimentos e cero proxectos”.

Propostas estudadas

No acto interviron tamén Jorge Balado, actual voceiro municipal do BNG, e Olga García, nº 2 da candidatura do BNG-Asembleas Abertas. Ambos coincidiron en sinalar como problemas que está a padecer Castro de Rei o desemprego e a emigración, especialmente a xuvenil. Así, sinalaron que desde o BNG-Asembleas Abertas “apostamos por un Concello que axilice a aprobación do PXOM, ampliando o aproveitamento do Polígono Industrial e xerando emprego en Castro de Rei. Que mellore o servizo municipal de auga potábel. Que promova o desenvolvemento dos núcleos rurais e a construción de vivendas sociais nas vilas de Castro Ribeiras de Lea e Castro de Rei.”

A candidata a Alcaldía, Digan Lagarón, salientou que o BNG-Asembleas Abertas ten “propostas concretas e estudadas” dixo “nós non vendemos fume, sabemos e queremos construír un Castro de Rei para vivir e traballar”. Entre estas propostas a candidata nacionalista indicou tamén que “en Castro de Rei urxe termos unConcello que preste atención prioritaria ás persoas maiores, ás persoas dependentes, ás que viven soas e ás máis desfavorecidas, priorizando o uso de recursos, tanto económicos como de infraestruturas, para acadar un benestar social colectivo e igualitario".

No ámbito económico, fixo fincapé na necesidade de apostar polo desenvolvemento dos principais sectores económicos e produtivos: agrogandeiro, comercial, turístico e industrial, e tamén na aposta pola promoción do potencial cultural de Castro de Rei, traballando desde o Concello “man a man” co tecido asociativo, dixo a candidata nacionalista.

Traballo, transparencia e honradez

Digna Lagarón subliñou que o BNG-Asembleas Abertas “é garantía de traballo, transparencia e honradez para Castro de Rei”, fronte a un PP que ten o concello “paralizado pola súa ineficacia”. “Fronte a isto, o BNG-Asembleas Abertas garante traballo en equipo, intolerancia coa corrupción e un Concello no que a veciñanza participe na toma de decisións” remarcou a candidata nacionalista.

CANDIDATURA DO BNG-ASEMBLEAS ABERTAS DE CASTRO DE REI

1.-DIGNA LAGARÓN DOVAL. 46 ANOS. CELADORA DO SERGAS - DESEMPREGADA. DUARRIA.

2.-OLGA GARCÍA PORTELA. 57 ANOS. EMPREGADA MATADOIRO GRUPO SADA. CASTRO RIBEIRAS DE LEA.

3.-AFONSO LEGASPI VEIGA. 42 ANOS. ADMINISTRATIVO. LUDRIO.

4.-Mª XESÚS CHAÍN ANLLO. 36 ANOS. TRABALLADORA DA USC. PONTE DE OUTEIRO.

5.-MANUEL ANLLO CANTO. GANDEIRO. 57 ANOS. BAZAR.

6.-ISABEL BUIDE CARABALLOSA. 32 ANOS. TRABALLADORA GARDERÍA INFANTIL. MONDRIZ.

7.-SERAFÍN CARBALLO CARBALLEIRA. 59 ANOS. FUNCIONARIO. GOBERNO.

8.-ANA MARÍA GARCÍA CORRAL. 33 ANOS. ENFERMEIRA. TRIABA.

9.-MÓNICA ARIAS DÍAZ. PROFESORA. 42 ANOS. CASTRO RIBEIRAS DE LEA.

10.-RAMÓN GONZÁLEZ GONZÁLEZ. 38 ANOS. CONSERXE IES DE CASTRO. CASTRO DE REI.

11.-FINA IGLESIAS ANDIÓN. 47 ANOS. GANDEIRA. PACIOS.

12.-XOSÉ MANUEL NOVO VÁZQUEZ. 58 ANOS. MÉDICO. CASTRO DE REI.

13.-DOMINGO EMILIO PÉREZ PICO. 67 ANOS. XUBILADO DE CORREOS. TRIABA.