O BNG impulsará a declaración BIC dos cemiterios neogóticos da Terra Chá

Membros do BNG en Vilalba coa deputada Olalla Rodil no cemiterio de Goiriz

O BNG proporá no Parlamento galego esta catalogación como un plan de usos para as usuarias e usuarios destes recintos

 

A deputada por Lugo do BNG, Olalla Rodil, cualificou a necesidade de “protexer estas pezas únicas en Galiza e mostra do traballo dos canteiros desta comarca”

O BNG impulsará a declaración BIC dos cemiterios neogóticos da Terra Chá

Lugo, 10 de novembro 2021.- O Bloque Nacionalista Galego presentará no Parlamento galego a proposta de declaración BIC dos cemiterios neogóticos da Terra Chá. Esta iniciativa vai acompañada tamén dun plan de usos destas instalacións fúnebres, o que garante a súa protección sen provocar dificultades e prexuizos ás propietarias e propietarios.

A deputada por Lugo do BNG, Olalla Rodil, sinalou que estes espazos fúnebres son únicos en Galiza “cemiterios como os de Goiriz, Alba, Román, Rioaveso ou Xermar no concello de Vilalba constitúen un patrimonio material do século XVI de enorme valor artístico e cultural e un elemento único da paisaxe da Terra Chá, mostra do traballo dos canteiros da comarca”

Neste senso, Olalla Rodil subliñou a necesidade desta protección “as administracións públicas deben pór en valor e difundir a súa historia, por isto desde o BNG defenderemos no Parlamento galego a que desenvolvan estas accións, ningún país prescindiría nin relegaría un elemento como son estes espazos” dixo a deputada.

Desde o BNG defenden que esta protección amparada pola Lei 5/2016, do 4 de maio, do patrimonio cultural de Galiza, a cal non suporá ningunha traba para as usuarias e usuarios, xa que nesta iniciativa inclúe a creación dun plan de usos. A deputada enfatizou a importancia desta medida “son espazos funerarios nos que moitas persoas teñen soterrados os seus familiares e en ningún caso queremos que a protección do patrimonio lles cause prexuízos” declarou Olalla Rodil.

O BNG impulsará a declaración BIC dos cemiterios neogóticos da Terra Chá