O BNG propón a mellora das condicións laborais do Servizo de Axuda no Fogar

Rubén Arroxo: “este servizo esencial permite proporcionar atención e as tarefas necesarias para que moitas persoas poidan garantir a súa calidade de vida”

O BNG rexistrou unha moción para o vindeiro pleno onde reclama á Xunta de Galiza que se garanta o cumprimento do convenio colectivo e o incremento salarial do persoal do SAF

O BNG propón a mellora das condicións laborais do Servizo de Axuda no Fogar

Lugo, 20 de xuño 2022. O BNG vén de presentar unha moción de cara ao vindeiro pleno municipal na que se reclama unha mellora nas condicións laborais das traballadoras e traballadores do Servizo de Axuda no Fogar. “Os servizos públicos garanten que a veciñanza poida contar con ferramentas que fagan a vida máis doada”, explicou o portavoz do BNG, Rubén Arroxo, que engadiu “o SAF permite garantir o dereito a unha vellez digna, e o persoal que presta este servizo cumpre un papel esencial, proporcionando atención e realizando as tarefas necesarias para que moitas persoas poidan garantir a súa calidade de vida”.

A proposta do BNG insta á Xunta de Galiza a asumir a súa competencia neste servizo, mediante a creación dun sistema público e galego de coidados, que garanta o dereito dunha vellez digna a toda a poboación. Ademais, o BNG reclama que o goberno galego traballe xunto coas organizacións sindicais e as empresas, garantindo o cumprimento do convenio colectivo do sector da atención a domicilio, cumprindo co incremento salarial do 6,5% ás traballadoras e traballadores deste servizo.

“As traballadoras do SAF levan loitando moitos anos pola súa profesionalización e contra os abusos das empresas concesionarias”, declarou Rubén Arroxo. Segundo o portavoz do BNG, “é de dereito recoñecer e facer efectivos os convenios do sector, e avanzar na mellora das condicións laborais das traballadoras e traballadores deste servizo esencial”.

O BNG propón a mellora das condicións laborais do Servizo de Axuda no Fogar