Becerreá, 23 de xuño de 2025.- O Bloque Nacionalista Galego de Becerreá convocou á veciñanza a unha xuntanza este luns 23 de xuño diante do centro de saúde de Becerreá para valorar a situación dos servizos sanitarios tras detectarse que non hai pediatra para esta comarca. 

Nesta xuntanza participaran xunto coa veciñanza da comarca de Cervantes  os concelleiros de Becerreá, Ovidio Montaña e Martín Gómez , a responsabel local de Becerreá, Sabela Pérea  e a deputada no Parlamento Galego polo BNG, Olalla Rodil.

A veciñanza da comarca de Cervantes trasladou ao Bng a súa preocupación pola situación na que vai quedar este centro de saúde trala falla de pediatra e o desprazamento que teñen que facer para ser atendidas ás crianzas ata o Hula. 

As veciñas e os veciños desta comarca manifestaron que no caso de que a Xunta non se comprometa a manter o este servizo médico en Becerreá estudarán a convocatoria de mobilizacións. Olalla Rodil trasladoulle o seu apoio á veciñanza para manter este consultorio, "se for preciso mobilizarémonos para manter os servizos públicos fundamentais, evitando que a Xunta discrimine as persoas que viven no rural".

Dende o BNG demandamos un compromiso coa veciñanza pola eliminación do pediatra neste centro médico pois defendemos a sanidade pública de todo o país especialmente o da zona da montaña lucense pois supón unha merma na calidade asistencial dos concellos da montaña nunha zona xeográficamente moi extensa e na que as distancias se multiplican por razóns orográficas.