Lugo, 13 de xuño de 2025. As concelleiras e concelleiros da Tenencia de Alcaldía participaron das actividades organizadas na primeira xornada do Arde Lucus 2025, recibindo a un grupo de estudantes do CEIP Anexa, que realizou un desfile na xornada da mañá, e visitando un dos múltiples campamentos romanos, onde coincidiron cun grupo da ONCE que estaba a realizar unha visita adaptada a persoas con problemas de visión.

Maite Ferreiro, concelleira de Cultura, afirmou que "esta fin de semana a ocupación turística de Lugo está próxima ao 100%, agardamos que centos de persoas visiten Lugo para desfrutar das múltiples actividades que se celebrarán ao longo da fin de semana". A área de Turismo está lista xa para atender a un importante número de visitantes, coa apertura do posto de información turística da praza Maior, "cunha ubicación privilexiada que nos permite chegar cada vez a máis persoas", explicou.

Maite Ferreiro explicou que "a cantidade de turistas que recibimos nos distintos postos do Concello non deixa de aumentar cada ano", e engadiu "a importante promoción de Lugo como destino turístico de calidade e o esforzo realizado pola área de turismo para que as visitantes reciban información de calidade están dando os seus froitos".