Lugo, 18 de marzo de 2025. A concelleira de Participación e Servizos á Veciñanza, Cristina López, anunciou unha nova iniciativa cultural que se integra na Programación de Primavera do Cemiterio de San Froilán. O Grupo de teatro Achádego realizará unha serie de paseos teatrais en diferentes xornadas, rememorando a vida e legado de persoeiros destacados da cidade.

A primeira sesión, que terá lugar o 23 de marzo, centrarase nas mulleres relevantes que deixaron unha marca imborrable na sociedade lucense. O Grupo de teatro Achádego, coa súa interpretación, revivirá as historias destas figuras femininas que contribuíron significativamente ao desenvolvemento cultural e social da cidade.

Esta actividade terá lugar o vindeiro domingo, 23 de marzo, a partir das 17:30 horas. As entradas poderán reservarse previamente nas oficinas do Cemiterio, na Oficina Municipal de Turismo ou no Cemiterio Municipal, cun máximo de 4 por persoa

Cristina López convida ás veciñas e veciños "a participar nesta iniciativa cultural que busca rescatar a memoria da cidade", e afirmou que as visitas teatralizadas ao Cemiterio son "oportunidades únicas para coñecer o noso pasado nunha instalación referencial de Lugo".